Skúlaskeið 3, Hafnarfirði

Í gagnasafni Minjastofnunar Íslands má finna upplýsingar um að húsið sem nú er Skúlaskeið 3 í Hafnarfirði sé svokallað „katalóghús“  flutt inn frá Noregi árið 1898 og reist sama ár á jörðinni Hábæ í Vogum á Vatnsleysuströnd, vandað að allri gerð. Hábær var hluti úr Stóru-Vogajörðinni og settist Árni Jónsson þar að, en Ásmundur sonur hans tók síðar við búinu.¹Skúlaskeið 3, Hafnarfirði, verknr. 2188 í gagnasafni Minjstofnunar Íslands; Guðmundur B. Jónsson (1987). Mannlíf og mannvirki í Vatnsleysustrandarhreppi, bls. 70-71. [Útg.staðar ekki getið:] Höfundur. Samkvæmt fornleifaskráningu í Vogum hefur húsið líklega staðið þar sem húsin við Tjarnargötu 1-3 standa nú (2023).²Kristborg Þórsdóttir og Sólveig Guðmundsdóttir Beck (2013). Deiliskráning fornleifa vegna mats á umhverfisáhrifum sjóvarna á Vatnsleysuströnd, bls. 12.  Reykjavík: Fornleifastofnun Íslands ses., skýrsla nr. FS521-13081.

„Árið 1920 veitti bæjarstjórinn í Hafnarfirði ábúanda á jörðinni Hábær, Ásmundi Árnasyni, leyfi til þess að flytja áðurnefnt hús á lóð „við fyrirhugað Skúlaskeið“ eða „neðan við fiskreit Davíðsson og Hobbs“.“ Árið eftir var húsið síðan flutt þangað sem það stendur enn við Skúlaskeið.³Skúlaskeið 3, Hafnarfirði, verknr. 2188 í gagnasafni Minjastofnunar Íslands. Ásmundur Árnason (1861-1930) var aflasæll útgerðarmaður, giftur Hallfríði Þorsteinsdóttur (f. 1866).

Á grunni Hábæjar lét Árni Theódór Pétursson reisa hús sem hann flutti frá Hvammi.⁴Guðmundur B. Jónsson (1987), bls. 71.

Í fyrstu brunavirðingu eftir flutning hússins, sem gerð var 8. október 1921, var húsinu lýst þannig:

a) Húsið er einlyft með porti og risi og 2 kvistum. Niðri skipt í 5 stofur og eldhús, klætt innan panel og stofurnar eru fóðraðar. Uppi skipt í 5 herbergi og eldhús, klætt innan panel og herbergin eru fóðruð, allt málað. Húsið er notað til íbúðar. Undir öllu húsinu er 2ja metra hár steinsteyptur kjallari með 5 gluggum, notaður til geymslu.
b) Anddyri með risi, klætt innan panel og fóðrað.⁵Gláma-Kím (2021, 15. janúar). Vesturbær Hafnarfjarðar. Húsakönnun, bls. 247. Hafnarfjörður. Umhverfis- og skipulagssvið. Sótt 20. nóvember 2023 af https://husaskraning.minjastofnun.is/Husakonnun_107.pdf.

Leitarorð: Vogar

Höfundur: Guðlaug Vilbogadóttir.
Síðast uppfært 29. janúar, 2026

Heimildaskrá

• 1
  Skúlaskeið 3, Hafnarfirði, verknr. 2188 í gagnasafni Minjstofnunar Íslands; Guðmundur B. Jónsson (1987). Mannlíf og mannvirki í Vatnsleysustrandarhreppi, bls. 70-71. [Útg.staðar ekki getið:] Höfundur.
• 2
  Kristborg Þórsdóttir og Sólveig Guðmundsdóttir Beck (2013). Deiliskráning fornleifa vegna mats á umhverfisáhrifum sjóvarna á Vatnsleysuströnd, bls. 12.  Reykjavík: Fornleifastofnun Íslands ses., skýrsla nr. FS521-13081.
• 3
  Skúlaskeið 3, Hafnarfirði, verknr. 2188 í gagnasafni Minjastofnunar Íslands.
• 4
  Guðmundur B. Jónsson (1987), bls. 71.
• 5
  Gláma-Kím (2021, 15. janúar). Vesturbær Hafnarfjarðar. Húsakönnun, bls. 247. Hafnarfjörður. Umhverfis- og skipulagssvið. Sótt 20. nóvember 2023 af https://husaskraning.minjastofnun.is/Husakonnun_107.pdf.