Skólabraut 10, Hellissandi

Þegar Lárus Skúlason (1844-1925) byggði sér íbúðarhús á Hellissandi árið 1889 er talið líklegt að hann hafi keypt hús, rifið það, flutt til Hellissands og endurbyggt þar. Ekki er vitað hvar hann keypti húsið. „Húsið gekk fyrst undir nafninu Nýjahús en eftir nokkur ár var farið að kalla það Lárusarhús og svo er það nefnt enn.“ Húsið telst vera númer 10 við Skólabraut og er elsta húsið á Hellissandi.¹Skúli Alexandersson (2008-2009). Lárus Skúlason og framfaraskeið á Hellissandi, bls. 53. Breiðfirðingur, 62, bls. 36-64.

Lárus Skúlason var mikill athafna- og framfaramaður á Hellissandi til lands og sjávar og tók virkan þátt í stjórnmálum. Hann beitti sér fyrir að koma á fastri og skipulagðri barnafræðslu og var formaður barnaskólanefndar. Árið 1890 stóð hann fyrir því að hús var flutt frá Stykkishólmi, það reist að nýju á Hellissandi og notað sem skólahús (lesa má um húsið hér).²Skúli Alexandersson (2008-2009).

Lárus gaf fósturdóttur sinni, Lárenzínu Lárusdóttur (1890-1952) húsið.³Kristinn Kristjánsson (1995). Upphaf skólahalds á Hellissandi. Kaflar úr lengri ritgerð, bls. 161. Breiðfirðingur, 53, bls. 154-176.

Síðar eignaðist Skúli Alexendersson (1926-2015) oddviti, alþingismaður og framkvæmdastjóri húsið og lét endurbyggja það á árunum 1993 til 1997. Hann fékk Pál V. Bjarnason arkitekt til liðs við sig og sjá má að vandað hefur verið til verka.⁴Lárusarhúsið endurgert (1997, 16. desember). Morgunblaðið, Blað D, bls. 14.

Leitarorð: Hellissandur

Höfundur: Guðlaug Vilbogadóttir.
Síðast uppfært 6. júní, 2025

Heimildaskrá

• 1
  Skúli Alexandersson (2008-2009). Lárus Skúlason og framfaraskeið á Hellissandi, bls. 53. Breiðfirðingur, 62, bls. 36-64.
• 2
  Skúli Alexandersson (2008-2009).
• 3
  Kristinn Kristjánsson (1995). Upphaf skólahalds á Hellissandi. Kaflar úr lengri ritgerð, bls. 161. Breiðfirðingur, 53, bls. 154-176.
• 4
  Lárusarhúsið endurgert (1997, 16. desember). Morgunblaðið, Blað D, bls. 14.