Pakkhús Höepfners, Akureyri

H.P. Tærgesen kaupmaður fékk Þorstein Daníelsson smið frá Skipalóni til að byggja fyrir sig stórt pakkhús á verslunarlóð sinni fyrir norðan læk um 1860, þar sem nú er lóð númer 19 við Hafnarstræti á Akureyri. Tærgesen drukknaði á leið frá Akranesi til Reykjavíkur árið 1862 og í kjölfarið keypti Carl J. Höepfner kaupmaður  húsið ásamt fleiri húsum Tærgesens (sjá: Verslunarhús Höepfners) og lét flytja „suður yfir lækinn“.¹Klemens Jónsson (1948). Saga Akureyrar, bls. 79 og 110. Akureyri: Akureyrarkaupstaður; Jón Hjaltason (1994). Saga Akureyrar. Kaupstaðurinn við Pollinn 1863-1905. II. bindi, bls. 27. Akureyri: Akureyrarbær Það var þó ekki flutt langt því þær verslunarlóðir sem Höepfner lagði undir sig voru rétt sunnan við lækinn (u.þ.b. þar sem lóð númer 15 við Hafnarstræti er nú, 2023), en þrátt fyrir það var húsaflutningurinn vandasamur, en húsið varð hluti af húsasamstæðu Gudmanns Efterfölger.²Hjörleifur Stefánsson (1986). Akureyri. Fjaran og innbærinn. Byggingarsaga, bls. 21-22, 120-121 og 123. [Reykjavík:] Torfusamtökin; Jón Hjaltason (1990). Saga Akureyrar. Í landi Eyrarlands og Nausta 890-1862. I. bindi, bls. 154-155. Akureyri: Akureyrarbær. Ekki er víst að búið hafi verið í húsinu, en það þykir sennilegt að í því hafi verið einhverjar vistarverur því húsið var stórt, á því margir gluggar og algengt að verslunarsveinar hefðu afdrep í verslununum.

Höepfner keypti einnig eignir félagsins Örum & Wulff árið 1866, ári síðar verslunarhús sem Páll Johnsens átti og árið 1879 eignaðist hann Gudmannsverslun, sem eftir það nefndist Gudmanns Efterfölger.³Klemens Jónsson (1948), bls. 71, 99 og 110. Því er óhætt að segja að Höepfner hafi verið umsvifamestur allra danskra kaup­manna á Akureyri á seinni hluta 19. aldar, en hann lést á fyrsta ári nýrrar aldar. Hann átti nær alla strandlengjuna á gömlu Akureyri og var byrjaður að seilast til áhrifa á Oddeyri líka. Hann var ekki óumdeildur, heldur þótti bæði drembinn og óviðfelldinn og viðsjáll í viðskiptum.⁴Jón Hjaltason (1994), bls. 208.

Hús þetta brann árið 1912, en þá brunnu alls 12 hús á spildunni milli Hafnarstrætis og Aðal­strætis.⁵Hjörleifur Stefánsson (1986), bls. 120-121; Voðabál á Akureyri (1912, 18. desember). Gjallarhorn, 7. árg., 13. tbl., bls. 50.

Höfundur: Guðlaug Vilbogadóttir.
Síðast uppfært 13. desember, 2023

Heimildaskrá

• 1
  Klemens Jónsson (1948). Saga Akureyrar, bls. 79 og 110. Akureyri: Akureyrarkaupstaður; Jón Hjaltason (1994). Saga Akureyrar. Kaupstaðurinn við Pollinn 1863-1905. II. bindi, bls. 27. Akureyri: Akureyrarbær
• 2
  Hjörleifur Stefánsson (1986). Akureyri. Fjaran og innbærinn. Byggingarsaga, bls. 21-22, 120-121 og 123. [Reykjavík:] Torfusamtökin; Jón Hjaltason (1990). Saga Akureyrar. Í landi Eyrarlands og Nausta 890-1862. I. bindi, bls. 154-155. Akureyri: Akureyrarbær.
• 3
  Klemens Jónsson (1948), bls. 71, 99 og 110.
• 4
  Jón Hjaltason (1994), bls. 208.
• 5
  Hjörleifur Stefánsson (1986), bls. 120-121; Voðabál á Akureyri (1912, 18. desember). Gjallarhorn, 7. árg., 13. tbl., bls. 50.