Melstaður, Hlíðargötu 32, Fáskrúðsfirði

Hjónin Jón Sveinsson (1854-1932) daglaunamaður og Solveig Bjarnadóttir (1862-1936) eru fyrst skráð í þurrabúðinni Melstað í Kolfreyjustaðasókn í Sóknarmannatali frá árinu 1896. Í fasteignamati árið 1916 er húsið nefnt Melstaðir og sagt byggt úr timbri með járnvörðu þaki og sömuleiðis járnvarið á tveimur hliðum. Grunnflötur þess var sagður vera rétt innan við 20 fermetrar, en hæð í mæni 3,76 svo væntanlega hefur verið ris á húsinu.

Árið 1918 er dóttir þeirra, Guðrún Bjarnlaug Jónsdóttir (1892-1959), orðin húsráðandi ásamt eiginmanni sínum, Bjarna Bjarnasyni (1890-1945) sjóróðramanni, en þau Jón og Solveig búa hjá þeim.

Árið 1921 flytja þau Guðrún og Bjarni í Laufás,, sem er líklega húsið sem fjallað er um hér: Laufás gamli, Fáskrúðsfirði – Húsaflutningar. Þá fluttu hjónin Hinrik Benedikt Jónsson (1885-1975) sjómaður og Arnórína Snjófríður Guðnadóttir (1880-1961) í Melstað.¹Íslendingabók; Sögulegt mann- og bæjatal; Þjóðskjalasafn Íslands. Sóknarmanntöl; Þjóðskjalasafn Íslands. Jarðir og fasteignir. Fasteignamat 1916-1918. Búðaþorp í Fáskrúðsfirði. Þar bjuggu þau þar til Snjófríður lést árið 1961, en þá flutti Hinrik til Vestmannaeyja.²Baldur Jónsson (1975, 8. júlí). Hinrik B. Jónsson frá Fáskrúðsfirði. Morgunblaðið, 62. árg., 151. tbl., bls. 27.

Melstaður stóð þar sem núna stendur húsið við Hlíðargötu 32 á Fáskrúðsfirði, sem byggt var á árunum 1972-1973. Þegar til stóð að byggja nýja húsið þurfti gamli Melstaður að víkja. Húsið var þá flutt að gamla fótboltavellinum á Fáskrúðsfirði, sem er fyrir neðan húsin númer 105 og 107 við Skólaveg. Þar var sjoppa í húsinu. Höfundur veit ekki hve lengi húsið stóð þar áður en það fauk út í veður og vind.³Kristín Ágústsdóttir (2005, október). Byggingarár húsa á Búðum í Fáskrúðsfirði, bls. 17. Unnið fyrir Veðurstofu Íslands. Neskaupstað: Náttúrustofa Austurlands;

Leitarorð: Fáskrúðsfjörður

Höfundur: Guðlaug Vilbogadóttir.
Síðast uppfært 17. apríl, 2026

Heimildaskrá

• 1
  Íslendingabók; Sögulegt mann- og bæjatal; Þjóðskjalasafn Íslands. Sóknarmanntöl; Þjóðskjalasafn Íslands. Jarðir og fasteignir. Fasteignamat 1916-1918. Búðaþorp í Fáskrúðsfirði.
• 2
  Baldur Jónsson (1975, 8. júlí). Hinrik B. Jónsson frá Fáskrúðsfirði. Morgunblaðið, 62. árg., 151. tbl., bls. 27.
• 3
  Kristín Ágústsdóttir (2005, október). Byggingarár húsa á Búðum í Fáskrúðsfirði, bls. 17. Unnið fyrir Veðurstofu Íslands. Neskaupstað: Náttúrustofa Austurlands;