Rafnseyri, Faxastígur 24, Vestmannaeyjum

Heiti: Rafnseyri

Byggingarár: 1913 (1918?)

Upphafleg notkun: Íbúðarhús

Fyrsti eigandi: Sigurður Ólafsson og Margrét Þorsteinsdóttir

Aðrir eigendur:

1918: Margrét Þorsteinsdóttir, ekkja Sigurðar

Upphafleg staðsetning: Kirkjuvegur 15 B, Vestmannaeyjum

Fyrst flutt: 1936 á Vestmannabraut 15, Vestmannaeyjum

Flutt: 1960 að Faxastíg 24, Vestmannaeyjum

Saga:

Á vefnum Heimaslóð er sagt að húsið Rafnseyri sé byggt árið 1918 eins og kemur fram í Fasteignaskrá Íslands.¹ Á húsinu er hins vegar skilti sem segir að byggingarárið sé 1913. Í æviágripi Sigurðar Ólafssonar (1879-1918) á Heimaslóð kemur fram að hann hafi flutt að Rafnseyri í lok árs 1913 með eiginkonu sinni Margréti Þorsteinsdóttur (1876-1952). Þau eignuðust 7 börn, en áður hafði Margrét eignast son, sem einnig bjó hjá þeim. Þegar Sigurður lést árið 1918 hélt Margrét áfram að búa á Rafnseyri, en árið 1921 giftist hún Guðlaugi Sigurðssyni (1901-1975), en hann hafði þá verið vinnumaður hjá Margréti um hríð. Þau hjón bjuggu á Rafnseyri til ársins 1936 eða 1938 þegar þau fluttu til Reykjavíkur. ²

Rafnseyri er fremst til vinstri á myndinni við hlið Gömlu rafstöðvarinnar við Kirkjustíg. Heimaslóð (2013, 22. janúar). Húsin á Heimaey. Rafnseyri. Sótt 30. desember 2023 af https://heimaslod.is/index.php/Rafnseyri

Húsið var reist við Kirkjuveg 15 B í Vestmannaeyjum, alveg upp við gömlu rafstöðina sem byggð hafði verið þremur árum áður. Síðar þótti þessi staðsetning óheppileg og kom í veg fyrir að hægt væri að byggja við rafstöðina. Húsið var því flutt á Vestmannabraut 15 árið 1936. Þar stóð húsið við hlið húss sem nefndist Völlur og var einnig flutt til ársins 1960 þegar það var flutt þangað sem það stendur enn, að Faxastíg 24. Um tíma var starfrækt rakarastofa í húsinu og einnig fiskbúð.³

Þess má geta, að gamla rafstöðin fór undir hraun í eldgosinu 1973⁴ og hefðu það einnig orðið örlög Rafnseyrar hefði húsið staðið á sínum upprunalega stað.

Leitarorð: Vestmannaeyjar

Höfundur: Guðlaug Vilbogadóttir.
Síðast uppfært 12. júlí, 2024

Heimildaskrá

1
Heimaslóð (2013, 22. janúar). Húsin á Heimaey. Rafnseyri. Sótt 30. desember 2023 af https://heimaslod.is/index.php/Rafnseyri
2
Viglundur Þór Þorsteinsson (2017, 27. nóvember). Heimaslóð. Æviskrár Víglundar Þórs Þorsteinssonar. Sótt 30. desember 2023 af https://heimaslod.is/index.php/Flokkur:%C3%86viskr%C3%A1r_V%C3%ADglundar_%C3%9E%C3%B3rs_%C3%9Eorsteinssonar
3
Heimaslóð (2013, 22. janúar). Húsin á Heimaey. Rafnseyri. Sótt 30. desember 2023 af https://heimaslod.is/index.php/Rafnseyri; Heimaslóð (2013, 22. janúar). Saga. Rafmagn. Sótt 30. desember 2023 af https://heimaslod.is/index.php/Rafmagn; Arnar Sigurmundsson (2010, 4. júní). Munnleg heimild; Haraldur Guðnason (1991). Við Ægisdyr. Saga Vestmannaeyjabæjar II, bls. 250. Reykjavík: Stofn.
4
Heimaslóð (2007, 6. júlí). Byggðin undir hrauninu. Gamla rafstöðin. Sótt 30. desember 2023 af https://heimaslod.is/index.php/Gamla_rafst%C3%B6%C3%B0in

Deila færslu

Höfundur: Guðlaug Vilbogadóttir.
Síðast uppfært 12. júlí, 2024