Bergvegur 15, Keflavík, Reykjanesbæ

Bjarni Jónsson (1859-1915) var afkastamikill húsasmiður í Reykjavík á árunum 1890 til 1910. Þekktasta húsið og það stærsta sem hann reisti er eflaust Bjarnaborg við Hverfisgötu 83, sem hann reisti árið 1902. Bjarnaborg var fyrsta fjölbýlishús bæjarins og grynnkaði verulega á húsnæðiseklu í Reykjavík. Árið 1905 stofnaði hann Timburverslunina Bakkabúð og hóf innflutning á timbri. Árið 1909 byggði verslunin parhús við Lindargötu, sem síðar fékk númerin Lindargata 44a og 44b. Húsið stóð við vesturenda fjölbýlishússins sem nú er númer 46a við Lindargötu.¹Hrefna Róbertsdóttir (1993, 1. október). Fyrsta blokkin. Bjarnaborg við Vitatorg. Iðnneminn, 61. árg., 3. tbl., bls. 74-81. Líklegt er að Bjarni hafi lagt gjörva hönd á smíði húsanna. Ekki er ósennilegt að húsin hafi verið ætluð starfsmönnun verslunarinnar.

Húsin  við Lindargötu voru brunavirt í maí 1909. Í brunavirðingunni kemur m.a. fram að húsin voru einlyft íbúðarhús með risi, byggð af bindingi. Þau voru klædd að utan með borðum og járni og sömuleiðis var járn á þakinu. Í binding var fyllt með sagspónum. Niðri í hvoru húsi voru 3 íbúðarherbergi, eldhús og tveir skápar, allt þiljað, með striga og pappír á veggjum og loftum, sem allt var málað. Þar var einn ofn og ein eldavél. Uppi var þurrkloft með trégólfi. Kjallari með timburgólfi var undir öllu húsinu. Hann var hólfaður í þrennt með tréskilrúmum. Suðurgafl húss númer 44a var hálfur eldvarnargafl á móti hálfum slíkum norðurgafli í húsi númer 44b. Við norðurgafl húss númer 44a var inngönguskúr með risi og kjallara, byggður eins og húsið. Slíkur skúr var við suðurgafl húss númer 44b. Grunnflötur hvors húss um sig ásamt viðbyggðum inngönguskúr var rúmir 44 fermetrar.²Borgarskjalasafn Reykjavíkur. Brunabótavirðingar. Bók 22-11-1905 til 28-03-1911. Aðfnr. 736. Brunav.nr. 1219. Sótt 14. febrúar 2025 af https://www.borgarskjalasafn.is/static/files/Midlun/Brunabotavirdingar/Brunavirdingar/736-bok-22-11-1905-til-28-03-1911-adfnr-736.pdf.

Árið 1918 keyptu hjónin Jón Jónatansson (1874-1925) og Kristjana Benediktsdóttir (1877-1954) húsið. Þar bjuggu þau allan sinn búskap og síðar börn þeirra. Var því húsið í eigu sömu fjölskyldunnar fram undir aldamótin 2000.³Minningar: Hulda Jónsdóttir (1999, 4. febrúar). Morgunblaðið, 87. árg., 28. tbl., bls. 50-51.

Þegar húsið var auglýst til sölu árið 2001 var því lýst þannig:

Þetta er fallegt og mikið endurnýjað hús,“ sagði Guðmundur Jónsson hjá Fasteignamarkaðinum. „Í kjallara hússins er sér ósamþykkt tveggja til þriggja herbergja íbúð með sérinngangi. Þar er forstofan dúklögð með skápum, hol með furugólfborðum, baðherbergi með sturtuaðstöðu og glugga, stofan er teppalögð og svo er einnig um svefnherbergi. Eldhúsið er með gömlum innréttingum og borðaðstöðu. Í íbúðinni á fyrstu hæð og risi er forstofan með kókosteppi á gólfi og þar er fatahengi. Baðherbergið er með glugga, baðkari og panelklæddum veggjum að hluta. Stofurnar eru þrjár og skiptanlegar, með furugólfborðum. Eldhús er dúklagt með gömlum innréttingum og borðaðstöðu. Í risi er stórt svefnherbergi með góðum klæðaskáp og súðarskápum, svalir eru útaf herbergi í norður með miklu útsýni. Húsið er endurnýjað á ytra byrði, t.a.m. nýlegt gler og gluggar, nýlegt járn og þak endurnýjað. Falleg ræktuð lóð.⁴Lindargata 44a (2001, 20. mars). Morgunblaðið, 89. árg., bls. C 7.

Árið 2005 var samþykkt að lóðin Hverfisgata 57a og sex lóðir við Lindargötu, nr. 40, 42, 42a, 44a, 44b og 46-48, skyldu sameinaðar í eina lóð sem teljast skyldi til Lindargötu og verða lóð fyrir stúdentagarða. Því varð að fjarlægja húsin við Lindargötu 44a og 44b. ⁵Borgarsögusafn. Húsaskrá Reykjavíkur. Í gagnasafni Húsafriðunarnefndar. Sama ár var húsið númer 44a flutt að Bergvegi 15 í Keflavík í Reykjanesbær og sett þar á nýjan grunn. Þangað hafa verið flutt nokkur gömul hús, m.a. húsið sem nú er Bergvegur 7. Samkvæmt upplýsingum frá umhverfis- og skipulagssviði Reykjanesbæjar brann sá hluti hússins sem var númer 44b meðan hann stóð í Helguvík í geymslu.⁶Guðlaugur H. Sigurjónsson, framkvæmdarstjóri Umhverfis og skipulagssviðs Reykjanesbæjar (2015, 18. febrúar). Tölvupóstur.

Höfundur: Guðlaug Vilbogadóttir.
Síðast uppfært 14. febrúar, 2025

Heimildaskrá

• 1
  Hrefna Róbertsdóttir (1993, 1. október). Fyrsta blokkin. Bjarnaborg við Vitatorg. Iðnneminn, 61. árg., 3. tbl., bls. 74-81.
• 2
  Borgarskjalasafn Reykjavíkur. Brunabótavirðingar. Bók 22-11-1905 til 28-03-1911. Aðfnr. 736. Brunav.nr. 1219. Sótt 14. febrúar 2025 af https://www.borgarskjalasafn.is/static/files/Midlun/Brunabotavirdingar/Brunavirdingar/736-bok-22-11-1905-til-28-03-1911-adfnr-736.pdf.
• 3
  Minningar: Hulda Jónsdóttir (1999, 4. febrúar). Morgunblaðið, 87. árg., 28. tbl., bls. 50-51.
• 4
  Lindargata 44a (2001, 20. mars). Morgunblaðið, 89. árg., bls. C 7.
• 5
  Borgarsögusafn. Húsaskrá Reykjavíkur. Í gagnasafni Húsafriðunarnefndar.
• 6
  Guðlaugur H. Sigurjónsson, framkvæmdarstjóri Umhverfis og skipulagssviðs Reykjanesbæjar (2015, 18. febrúar). Tölvupóstur.