Kirkjuvegur 39, Keflavík, Reykjanesbæ

Árið 1930 var gert fasteignamat á húsi Þorsteins Árnasonar við Suðurgötu í Keflavík. Þá var húsið sagt númer 6, en síðar fékk það húsnúmerið 8. Í matinu koma eftirfarandi upplýsingar fram um húsið: Húsið var byggt á árnum 1929 til 1930 úr timbri, með steinsteyptu gólfi og bárujárni á útveggjum. Grunnflötur hússins var tæpur 68 fermetrar og í því voru tvær íbúðir. Uppi voru tvö herbergi og eldhús og niðri voru 5 herbergi og eldhús. Kjallari var undir húsinu, sem var jafn stór og húsið. Þar var ekki íbúð. Húsið var hlýtt og rakalaust með miðstöðvarhitun og tveimur eldavélum. Raflýsing var í húsinu.¹Gögn úr skjalasafni Reykjanesbæjar.

Þorsteinn Árnason (1885-1969) kvæntist Guðnýju Helgu Vigfúsdóttur (1882-1943) árið 1908. Þau hófu búskap að Gerðum í Garði hjá foreldrum Þorsteins, en árið 1928 fluttu þau til Keflavíkur þar sem þau byggðu sér hús á Suðurgötu 8 þar sem Þorsteinn bjó síðan alla tíð. Þorsteinn stundaði sjómennsku framan af ævi á milli þess sem hann stundaði smíðar. Eftir að hann flutti til Keflavíkur stundaði hann eingöngu smíðar og byggði mörg hús í Keflavík. Einnig rak hann um langt skeið trésmíðaverkstæði í félagi við tengdason sinn. Árið 1943 lést Guðný Helga. Þau eignuðust 10 börn. Hún tók mikinn þátt í félagsstörfum og var m.a. formaður slysavarnadeildar í Keflavík um árabil. Árið 1950 kvæntist Þorsteinn Ingveldi S. Pálsdóttur (1911-1987) og eignaðist með henni tvö börn.²Þorsteinn Árnason – Minningarorð (1969, 1. febrúar). Morgunblaðið, 56. árg., 26. tbl., bls. 14.

Þegar fyrir lá að húsið þurfti að víkja vegna viðbyggingar við hús Sparisjóðsins í Keflavík hafði sparisjóðurinn eignast húsið. Sjóðurinn bauð björgunarsveitinni Stakk húsið til eignar með því skilyrði að sveitin fjarlægði húsið af lóðinni. Stakkfélagar gripu tækifæri og fluttu húsið að Kirkjuvegi 39 þar sem húsið stendur enn. Allt verkið var unnið af sjálfboðaliðum úr Stakki með aðstoð velunnara sveitarinnar.³Garðar Sigurðsson (2021, 18. mars). Keflavík og Keflvíkingar. Sótt 18. mars 2025 af https://www.facebook.com/groups/59627962212/search?q=su%C3%B0urgata.

Höfundur: Guðlaug Vilbogadóttir.
Síðast uppfært 14. ágúst, 2025

Heimildaskrá

• 1
  Gögn úr skjalasafni Reykjanesbæjar.
• 2
  Þorsteinn Árnason – Minningarorð (1969, 1. febrúar). Morgunblaðið, 56. árg., 26. tbl., bls. 14.
• 3
  Garðar Sigurðsson (2021, 18. mars). Keflavík og Keflvíkingar. Sótt 18. mars 2025 af https://www.facebook.com/groups/59627962212/search?q=su%C3%B0urgata.