Víkurbraut 30, Vík í Mýrdal

Árið 1902 byggðu bræðurnir Jón (1864-1947) og Loftur (1875-1917) Þorsteinssynir hús skammt vestan og örlítið sunnan við Brydebúð (Víkurbraut 28). Húsið nefndist Lækjamót og stendur enn og er númer 30c við Víkurbraut. Árið 1888 kvæntist Jón Guðríði Brynjólfsdóttur (1860-1935).

Jón seldi síðar sinn hluta af húsinu Þorsteini Þorsteinssyni (1877-1965), verslunarmanni og síðar kaupmanni. Árið 1906 flutti Þorsteinn húsið um rúma breidd sína í norður, nær brekkunni og stækkaði það um leið. Nú er húsið skráð við Víkurbraut 30.

Svo virðist sem hann hafi keypt húsið nokkru áður, því árin 1904 og 1905 fæddust dætur Þorsteins í húsinu áður en það var flutt. Þeir sem sáu um smíði hússins þegar það var flutt voru bræðurnir Erlendur og Sigurður Björnssynir og Bergsteinn sonur Erlendar. Unnu þeir að smíðinni fyrri hluta vetrar 1906.

Eiginkona Þorsteins var Helga Ólafsdóttir (1873-1943), en þau gengu í hjónaband árið 1902. Þorsteinn lauk gagnfræða- og kennaraprófi frá gagnfræðaskólanum í Flensborg í Hafnarfirði og var hann barnakennari í Víkurþorpi í nokkur ár. Hann hóf síðar störf hjá Brydesverslun í Vík, fyrst sem verslunarþjónn, síðar bókhaldari eða verslunarstjóri. Hann keypti síðan verslunina árið 1914 ásamt Jóni Þorsteinssyni hreppstjóra í Norður-Vík. Þegar hann flutti til Reykjavíkur árið 1926 seldi hann Kaupfélagi Skaftfellinga verslunina.

Árið 1912 flutti Sigurður söðlasmiður Einarsson (1879-1971) í húsið ásamt Valgerði Pálsdóttur (1879-1964) konu sinni.¹Eiríkur E. Sverrisson (1988). Víkurkauptún 1890-1930, bls. 44-57. Í Dynskógar. Rit Vesturskaftellinga, bls. 7-130.

Um húsið segir m.a. í húsakönnun í vesturhluta Víkur í Mýrdal:

Þegar húsið var sambyggt Lækjarmóti í upphafi hefur risið verið hátt eins og það er í dag. Eftir að það var flutt fékk það lágris eins og flest hin húsin. Síðar hefur því verið breytt aftur og þannig er núverandi form hússins líkast því sem það var meðan það var sambyggt Lækjarmóti.²Kristín Una Sigurðardóttir (2019). Vesturhluti Víkur í Mýrdal. Húsakönnun. Sótt 27. júlí 2024 af https://husaskraning.minjastofnun.is/Husakonnun_202.pdf.

Höfundur: Guðlaug Vilbogadóttir.
Síðast uppfært 29. júlí, 2024

Heimildaskrá

• 1
  Eiríkur E. Sverrisson (1988). Víkurkauptún 1890-1930, bls. 44-57. Í Dynskógar. Rit Vesturskaftellinga, bls. 7-130.
• 2
  Kristín Una Sigurðardóttir (2019). Vesturhluti Víkur í Mýrdal. Húsakönnun. Sótt 27. júlí 2024 af https://husaskraning.minjastofnun.is/Husakonnun_202.pdf.