Vík, í landi Hafnarhólms, Selströnd

Hjónin Hildur Gestsdóttir (1896-1984) og Loftur Torfason (1892-1965) bjuggu allan sinn búskap í Vík, sem var í landi Hafnarhólms á Selströnd í Steingrímsfirði. Fyrst byggðu þau þar torfbæ árið 1917 en þegar þau keyptu hálfa Hveravíkina af Jósteini Guðmundssyni (1911-1986) árið 1942 fleytti Loftur húsi sem var í Hveravík á tunnum út í Vík og setti niður þar.¹Björn H. Björnsson (2012, 1. júní). Um húsagang við Húnaflóa, bls. 34. Strandapósturinn, 44. árg., bls. 31-36.

Sigurður Guðmonsson átti að draga það á Gróttu, en þá gerði skyndilega norðan áhlaup svo ekki tommaði hjá Sigga. Var nú illt í efni, allt stefndi í að Loftur missti hús sitt yfir til Tungusveitunga, en þá kom Halldór Magnússon á Rut og kláraði það. Árið 1985 er húsið brennt af erfingjum Lofts og Hildar, en þeir iðruðust þess mjög síðar. Í dag stendur þarna laglegt sumarhús einhverra barna þeirra hjóna, en gamli torfbærinn er með öllu horfinn.²Björn H. Björnsson (2012, 1. júní), bls. 34.

Höfundi hefur ekki tekist að finna upplýsingar um hver það var sem byggði húsið upphaflega í Hveravík, en væntanlega hefur það verið annað hvort Jósteinn Guðmundsson eða Ingimundur (1895-1983) bróðir hans. Jósteinn keypti Hveravík af Ingimundi árið 1939, sem þá flutti til Hólmavíkur.³Guðmundur Guðni Guðmundsson (1986, 19. febrúar). Minning: Jósteinn Guðmundsson frá Byrgisvík. Morgunblaðið, 72. árg., 41. tbl., bls. 45.

Leitarorð: Strandir – Steingrímsfjörður

Höfundur: Guðlaug Vilbogadóttir.
Síðast uppfært 1. desember, 2025

Heimildaskrá

• 1
  Björn H. Björnsson (2012, 1. júní). Um húsagang við Húnaflóa, bls. 34. Strandapósturinn, 44. árg., bls. 31-36.
• 2
  Björn H. Björnsson (2012, 1. júní), bls. 34.
• 3
  Guðmundur Guðni Guðmundsson (1986, 19. febrúar). Minning: Jósteinn Guðmundsson frá Byrgisvík. Morgunblaðið, 72. árg., 41. tbl., bls. 45.