Vesturgata 6 í landi Hallkelshóla, Grímnesi

Árið 1926 lét Kristján Guðnason (1894-1954) útgerðarmaður í Keflavík reisa sér íbúðarhús á landi sem hann hafði fengið leigt úr landi Keflavíkurjarðarinnar. Var lóðin númer 6 við Vesturgötu. Húsasmíðameistari af húsi þessu var Skúli Skúlason (1878-1955) í Keflavík, en allur smíðaviður var keyptur í versluninni Völundi hf. í Reykjavík fyrir fé sem Kristján hafði fengið að láni hjá Landsbanka Íslands. Eiginkona Kristjáns var Guðrún Ólafsdóttir (1894-1978).¹Guðleifur Sigurjónsson (ódags.). Saga hússins Vesturgötu 6, síðar nr. 10, í Keflavík. Óútgefin samantekt í eigu Ástu Guðleifsdóttur.

Í júní 1930 var gert fasteignamat á húsi númer 6 við Vesturgötu í Keflavík (nú Reykjanesbæ). Eigandi hússins var þá Kristján Guðnason fyrsti eigandi þess. Húsið var sagt byggt árið 1926, 6,3 x 4,4 m að grunnfleti, byggt úr timbri, járnklætt á þaki og veggjum. Ein íbúð var í húsinu með þremur herbergjum og inngönguskúr. Geymslukjallari var undir húsinu og einnig var geymsla í risi. Hvorki voru vatnslagnir né baðtæki í húsinu, en húsið var raflýst og þar var eldavél og ofn og það sagt hlýtt.²Fasteignamat 1930. Í skjalasafni Reykjanesbæjar.

Þau Kristján og Guðrún fluttu til Reykjavíkur árið 1937. Húsið keyptu þá hjónin Sigurjón Sumarliðason (1909-1942) og Margrét Guðleifsdóttir (1913-2005).

Þegar breytingar voru gerðar á húsnúmerum í Keflavík vorið 1945 varð húsið Vesturgata 6 að Vesturgötu 10.

Sigurjón stundaði alla almenna vinnu til lands og sjávar, var m.a. lengi á mótorbátnum Ólafi Magnússyni bæði sem sjó- og landmaður. Hann annaðist einnig öskuhreinsun í Keflavík ásamt öðrum manni á tímabili og var þá notaður hestvagn til starfans og þurftu þeir sjálfir að annast fóðuröflun fyrir hestinn. Þá vann hann við skósmíðar um tíma. Þegar Bretavinnan hófst í seinni heimstyrjöldinni vann hann sem smiður hjá Bretunum og var við vinnu í Mosfellssveit þegar hann lést úr heilahimnubólgu 16. september 1942.

Árið 1963 seldi Margrét Guðleifsdóttir bæjarsjóði Keflavíkur húsið en þar hafði hún búið ein með fjórum börnum sínum síðan Sigurjón lést árið 1942. Til að sjá fjölskyldunni farborða vann hún lengi framan af í Frystihúsa Keflavíkur hf., síðan Efnalaug Suðurnesja og loks í eldhúsi Hótels Loftleiða á Keflavíkurflugvelli.

Um 1970 þurfti húsið að víkja vegna fyrirhugaðra nýbygginga við Vesturgötuna. Var þá húsið tekið af grunni sínum og fest á þrjá góða svartbikaða tréljósastaura og flutt út á Hólmsberg í brekku upp og norður af vesturenda Grófarinnar (þar sem nú eru göturnar Selvík og Hvalvík), en þar voru kartöflugarðar bæjarbúa og skólagarðar fyrir börn í Keflavík. Þar var húsið notað sem vinnuskúr og geymsla.

Eftir að garðarnir voru fluttir árið 1991 stóð til að láta Slökkvilið Keflavíkur hafa húsið til æfinga, en það þótti Guðleifi Sigurjónssyni (1932-2010), syni hjónanna Sigurjóns og Margrétar, sem alist hafði upp í húsinu, erfitt að hugsa sér og óskaði eftir því að fá að eiga húsið með því skilyrði að flytja það á brott. Það gekk eftir árið 1991 og síðar urðu börn hans meðeigendur í húsinu og eiga enn í dag.³Guðleifur Sigurjónsson (ódags.).

Eftir að Guðleifur sleit barnsskónum í Keflavík bjó hann m.a. í Hafnarfirði og Hveragerði. Hann útskrifaðist árið 1962 í hópi fyrstu skrúðgarðyrkjumeistara á landinu. Árið eftir flutti hann ásamt konu sinni, Ástríði Hjartardóttur (1932-2017), og börnum aftur til Keflavíkur. „[H]óf Guðleifur starf hjá Keflavíkurbæ árið 1963 sem garðyrkjustjóri, lóðarskrárritari frá 1972 og síðasta starf hans var forstöðumaður Byggðasafns Suðurnesja. Hjónin hófu plöntusölu í Keflavík 1964 og ráku þar einnig gróðrarstöð í nokkur ár.“⁴Minning: Guðleifur Sigurjónsson (2010, 5. júní). Morgunblaðið, 98. árg., 129. tbl., bls. 40.

Þegar Guðleifur hafði eignast húsið var það flutt á iðnaðarsvæði við Iðavelli í Keflavík þar sem húsið var endurbætt og það undirbúið fyrir flutning. Snemma árs 2000 var það síðan flutt í heilu lagi á vörubílspalli austur í land Hallkelshóla í Grímsnesi þar sem það stendur enn og nýtt sem sumarbústaður fjölskyldunnar. Bæði hefur verið byggt við gamla húsið og bætt við húsum á lóðina og auðséð að vel hefur verið hlúð að öllu á lóðinni, gróðri og mannvirkjum.⁵Ásta Guðleifsdóttir (2026, 9. júní). Munnleg heimild.

Leitarorð: Hallkellshólar

Höfundur: Guðlaug Vilbogadóttir.
Síðast uppfært 10. júní, 2026

Heimildaskrá

• 1
  Guðleifur Sigurjónsson (ódags.). Saga hússins Vesturgötu 6, síðar nr. 10, í Keflavík. Óútgefin samantekt í eigu Ástu Guðleifsdóttur. ↩︎
• 2
  Fasteignamat 1930. Í skjalasafni Reykjanesbæjar. ↩︎
• 3
  Guðleifur Sigurjónsson (ódags.). ↩︎
• 4
  Minning: Guðleifur Sigurjónsson (2010, 5. júní). Morgunblaðið, 98. árg., 129. tbl., bls. 40. ↩︎
• 5
  Ásta Guðleifsdóttir (2026, 9. júní). Munnleg heimild. ↩︎