Lækjarfit 1, Garðabæ

Á lóðinni sem nú er númer 48 við Laugarnesveg í Reykjavík byggði Aðalsteinn Jónsson (1901-1973) sér og fjölskyldu sinni lítið timurhús árið 1926 og nefndi Brimnes. Eiginkona Aðalsteins var Þorgerður Árnadóttir (1902-1976).

Þegar húsið var brunavirt í júlí 1928 virðist Aðalsteinn búinn að stækka hús sitt. Það var sagt einlyft íbúðarhús með risi, byggt úr bindingi, klætt utan borðum, pappa og járni á veggjum og þaki. Á aðalhæð hússins voru 2 íbúðar herbergi, eldhús og gangur, allt þiljað að innan veggfóðrað og málað. Á þaklofti var eitt þiljað og málað íbúðarherbergi, tvö geymsluherbergi og framloft. Eldavél, miðstöð og vatns- og skolplagnir voru í húsinu. Lengd hússins var 4,7 m og breidd þess 7 m.

Enn var húsið stækkað árið 1934, en þá var Friðrik Gíslason (1900-1979) bifvélavirki eigandi þess ásamt konu sinni Sigríði Ásmundsdóttur (1903-1988). Á baklóð hússins var bifreiðaverkstæði þar sem Friðrik stundaði bílaviðgerðir.¹Drífa Kristín Þrastardóttir og Guðný Gerður Gunnarsdóttir (2009). Húsakönnun. Laugarnesvegur – Sundlaugavegur – Laugalækur – Hrísateigur – Otrateigur, bls. 21. Minjasafn Reykjavíkur. Skýrsla nr. 150; Borgarskjalasafn Reykjavíkur. Brunabótavirðingar. Bók 21-01-1928 til 21-06-1930. Aðfnr. 744. Brunavirðinganr. 2448;  Teikningavefur Reykjavíkurborgar. Laugarnesvegur 38. Sótt 8. maí 2025 https://skjalasafn.reykjavik.is/fotoweb/.

Lækjarfit 1 í Garðabæ árið 2022. Ljósm.: Fasteignasalan Torg. Sótt 8. maí 2025 af https://fastinn.is/soluskra/1038186#images.

Þegar til stóð að reisa nýtt fjölbýlishús á lóðinni við Laugarnesveg 48 þurfti húsið að víkja og steinsteypt hús var byggt á lóðinni árið 1960.

Árið 1957 samþykkti Garðahreppur að húsið væri sett á lóðina Lækjarfit 1 í Garðahreppi (nú Garðabæ). Þar var húsið sett á hærri grunn en þann sem það stóð á við Laugarnesveginn og kjallari gerður að íbúð. Tveir eigendur voru skráðir af húsinu árið 1962, þau Laufey Einarsdóttir sem átti hæðina og risið og Finnbogi Sævar Guðmundsson sem átti kjallarann.²Kortavefur Garðabæjar ásamt gögnum Húsnæðis- og mannvirkjastofnunar. Húsið stendur enn við Lækjarfit 1 og virðist una hag sínum vel.

Höfundur: Guðlaug Vilbogadóttir.
Síðast uppfært 8. maí, 2025

Heimildaskrá

• 1
  Drífa Kristín Þrastardóttir og Guðný Gerður Gunnarsdóttir (2009). Húsakönnun. Laugarnesvegur – Sundlaugavegur – Laugalækur – Hrísateigur – Otrateigur, bls. 21. Minjasafn Reykjavíkur. Skýrsla nr. 150; Borgarskjalasafn Reykjavíkur. Brunabótavirðingar. Bók 21-01-1928 til 21-06-1930. Aðfnr. 744. Brunavirðinganr. 2448;  Teikningavefur Reykjavíkurborgar. Laugarnesvegur 38. Sótt 8. maí 2025 https://skjalasafn.reykjavik.is/fotoweb/.
• 2
  Kortavefur Garðabæjar ásamt gögnum Húsnæðis- og mannvirkjastofnunar.