Kirkjuvegur 4, Ólafsfirði

Um 1920 keyptu hjónin Stefán Hafliði Steingrímsson (1892-1972) verkamaður og Jónína Kristín Gísladóttir (1895-1979) lítinn torfbæ á Ólafsfirði sem nefndur var Miðbær. Árið 1928 byggðu þau timburhús á sama stað, sem einnig var nefnt Miðbær. Húsið stóð við Aðalgötu 10 á Ólafsfirði. Það var portbyggt bárujárnsklætt timburhús, sem stóð á steyptum hálf-niðurgröfnum kjallara, rétt manngengum. Inngangur var um steyptar tröppur á jarðhæð hússins. Í Miðbæ bjuggu þau Stefán og Jónína allan sinn búskap, en þau eignuðust tíu börn. Og enn er húsið í eigu afkomanda þeirra, svokallaðrar Miðbæjarættar eins og afkomendurnir kalla sig, þó það hafi um stund verið í eigu annarra (1976-1983).

Oftast bjuggu einnig leigjendur í húsinu þannig að oft hefur verið þröng á þingi í þessu litla húsi.

Árið 1983 stóð til að reisa stórhýsi fyrir Sparisjóð Ólafsfjarðar á horni Aðalgötu og Kirkjuvegs og þurfti þá litla húsið að víkja. Þegar til stóð að rífa það eignaðist Lilja Kristinsdóttir (1941-2015) sonardóttir þeirra hjóna húsið og lét flytja það suður að Reykjum, sem er innst í Ólafsfirði undir Lágheiði. Þar nýtti hún og fjölskylda hennar húsið sem sumarbústað.

Útlitsteikning Studio Granda, dags. 10. júní 2018. Sótt 19. febrúar 2026 af https://teikningar.fjallabyggd.is/Kirkjuvegur/fb-008612.pdf.

Þar stóð Miðbær til ársins 2019 þegar núverandi eigandi hans flutti hann aftur inn í bæinn, á lóð númer 4 við Kirkjuveg, þar sem áður stóð steinsteypt hús. Nú stendur húsið því örskammt frá sínum upphaflega stað á Ólafsfirði og liggja lóðirnar tvær saman. Unnið er að því að gera húsið upp og stækka lítillega á vandaðan hátt í samræmi við gerð þess og upprunalegt útlit samkvæmt teikningum frá arkitektum Studio Granda.¹Kristinn E. Hrafnsson (2026, 16. febrúar). Munnleg heimild og tölvupóstur; Fjallabyggð. Kortasjá. Teikningar. Kirkjuvegur 4, Ólafsfirði. Afstöðumynd, dags. 10. júní 2018; Friðrik G. Olgeirsson (1984). Hundrað ár í Horninu. Saga Ólafsfjarðar 1883-1944, bls. 106. Útg.: Ólafsfjarðarkaupstaður.

Höfundur: Guðlaug Vilbogadóttir.
Síðast uppfært 20. febrúar, 2026

Heimildaskrá

• 1
  Kristinn E. Hrafnsson (2026, 16. febrúar). Munnleg heimild og tölvupóstur; Fjallabyggð. Kortasjá. Teikningar. Kirkjuvegur 4, Ólafsfirði. Afstöðumynd, dags. 10. júní 2018; Friðrik G. Olgeirsson (1984). Hundrað ár í Horninu. Saga Ólafsfjarðar 1883-1944, bls. 106. Útg.: Ólafsfjarðarkaupstaður.