Hugljótsstaðir, Höfðaströnd, Skagafirði

„Árið 1897 fluttust ungu hjónin Frans Jónatansson [1873-1958] og Jóhanna Gunnarsdóttir [1878-1964] í nýbyggt hús er þau höfðu reist á landamerkjum Bæjar og Mannskaðahóls við Höfðavatn, syðst við vatnið í svokallaðri Kotabót, rétt austan við Urriðalæk,  Húsið nefndu þau Garðhús. Þar bjuggu þau til 1910, að þau fluttust til Málmeyjar.“¹Hjalti Pálsson, Egill Bjarnason og Kári Gunnarsson (2014). Byggðasaga Skagafjarðar. VII. bindi. Hofshreppur, bls. 426. Ritstjóri og aðalhöfundur: Hjalti Pálsson frá Hofi. Sauðárkróki. Sögufélag Skagfirðinga. Ekki stunduðu þau Frans og Jóhanna búskap, en Frans sótti sjó og sinnti barnakennslu. Árið 1911 fluttist Kjartan Vilhjálmsson (1866-1954) frá Þverá í Hrolleifsdal í Garðhús, en frá 1917 til 1925 bjuggu þar Sigurður Ólafsson (1868-1925) og Margrét Baldvinsdóttir (1871-1942), sem komu frá Hugljótsstöðum. Sigurður lést í janúar 1925 og keyptu þá bræðurnir Helgi (1907-1985) og Sveinn (1900-1991) Símonarsynir frá Hugljótsstöðum húsið og fluttu að Hugljótsstöðum. Lengi sást móta fyrir kjallara hússins í Garðhúsi, u.þ.b. 3 x 2,5 m að stærð, og gerir ef til vill enn.

Sigurmon Þórðarson (Monsi) skoðar Hugljótsstaði. Heimild: Hofosingur.is. Mynd sótt 13. febrúar 2024 af http://13.59.204.163/media/photologue/photos/207_n.jpg

Að Hugljótsstöðum var búið í húsinu til ársins 1952, þegar nýtt íbúðarhús var steypt, en eftir það var það notað sem geymsla og fjárhús. Sveinn bjó á Hugljótsstöðum til ársins 1980 með örfáum hléum, en hann lést 27. janúar 1991. Daginn eftir að hann var jarðaður í Hofskirkjugarði 3. febrúar 1991 brast á hávaðarok, sem olli víða skaða í Hofshreppi. Þá hvarf gamla timburhúsið af grunni sínum ásamt fjárhúsi og fjósbragga.²Hjalti Pálsson, Egill Bjarnason og Kári Gunnarsson (2014), bls. 311, 316 og 426.

Leitarorð: Skagafjörður

Höfundur: Guðlaug Vilbogadóttir.
Síðast uppfært 17. febrúar, 2024

Heimildaskrá

• 1
  Hjalti Pálsson, Egill Bjarnason og Kári Gunnarsson (2014). Byggðasaga Skagafjarðar. VII. bindi. Hofshreppur, bls. 426. Ritstjóri og aðalhöfundur: Hjalti Pálsson frá Hofi. Sauðárkróki. Sögufélag Skagfirðinga.
• 2
  Hjalti Pálsson, Egill Bjarnason og Kári Gunnarsson (2014), bls. 311, 316 og 426.