Hlíðargata 2, Neskaupstað

Þorsteinn Þ. Viglundsson (1969). Frá Mjóafirði eystra, bls. 392. Blik. Ársrit Vestmannaeyja 1969. 27. árg

Húsið númer 2 við Hlíðargötu í Neskaupstað var byggt úr norskum plankaviði árið 1888 í Holti í Mjóafirði af Gísla Hjálmarssyni (1864-1942) kaupmanni og útgerðarmanni frá Brekku í Mjóafirði og konu hans Hildi Agötu Grönsjá (1867-1940). Gísli gerðist útgerðarmaður á Brekku um 1890, en nokkrum árum síðar flutti hann með útgerð sína til Norðfjarðar, þar sem hann gerðist umsvifamikill í útgerð, búskap, verslun og fiskvinnslu.¹Þorsteinn Þ. Viglundsson (1969). Frá Mjóafirði eystra, bls. 392. Blik. Ársrit Vestmannaeyja 1969. 27. árg; Ó.H.S. (1942, 10. mars). Minning. Morgunblaðið, 29. árg., 24. tbl., bls. 7; Vilhjálmur Hjálmarsson (1990). Mjófirðingasögur. Þriðji hluti, bls. 140. Reykjavík: Bókaútgáfa Menningarsjóðs.

Gunnar Jónsson (1861-1923) og Nikólína Sigurðardóttir  (1860-1922) komu að Holti þegar Gísli fór þaðan 1893. Þar bjuggu þau til ársins 1918, oft í félagi við aðra. Oft var því mannmargt í Holti, um eða yfir 20 manns. Gunnar lagði rækt við túnblettinn í Holti, hélt um 40 kindur, tvær kýr og einn hest. En helstu umsvif hans tengdust útgerð og fiskvinnslu. Gunnar var einnig dugmikill í margvíslegu félagsstarfi, sat m.a. í hreppsnefnd og starfaði með góðtemplarastúkunni í Mjóafirði.²Vilhjálmur Hjálmarsson (1990), bls. 143-146.

Sigdór Vilhjálmsson, síðar Brekkan (1884-1964), kennari frá Brekku í Mjóafirði keypti húsið árið 1918. Sama ár kvæntist hann Önnu Hermannsdóttur (1883-1956) sem einnig var úr Mjóafirði. Þau bjuggu þó í Holti einungis til sumarsins 1919, þegar Sigdór reif húsið og endurbyggði það á lóð sem nú (2023) er númer 2 við Hlíðargötu í Neskaupstað (áður Þiljuvellir 40). Þar áttu þau Anna heima til æviloka. Heimili þeirra var viðbrugðið fyrir gestrisni og myndarskap og garðurinn bar vott um snyrtimennsku og alúð.

Sigdór var kennari við barnaskóla Norðfjarðar frá árinu 1915 þar til hann lauk störfum vegna aldurs árið 1953. Auk þess starfaði hann að margvíslegum félagsmálum þar sem hann lagði áherslu á bindindismál, var organisti í kirkjunni og kenndi á orgel og var fyrsti gjaldkeri Sparisjóðs Norðfjarðar. Hann var sæmdur riddarakrossi Fálkaorðunnar fyrir störf að félags- og menningar­málum árið 1960.³Jón I. Jónsson (1964, 4. september). Sigdór V. Brekkan kennari, Neskaupstað. Morgunblaðið, 51. árg., 206. tbl., bls. 17; Þorsteinn Þ. Viglundsson (1969), bls. 392; Vilhjálmur Hjálmarsson (1990), bls. 160-161.

Leitarorð: Mjóifjörður – Neskaupstaður – Norðfjörður

Höfundur: Guðlaug Vilbogadóttir.
Síðast uppfært 20. febrúar, 2024

Heimildaskrá

• 1
  Þorsteinn Þ. Viglundsson (1969). Frá Mjóafirði eystra, bls. 392. Blik. Ársrit Vestmannaeyja 1969. 27. árg; Ó.H.S. (1942, 10. mars). Minning. Morgunblaðið, 29. árg., 24. tbl., bls. 7; Vilhjálmur Hjálmarsson (1990). Mjófirðingasögur. Þriðji hluti, bls. 140. Reykjavík: Bókaútgáfa Menningarsjóðs.
• 2
  Vilhjálmur Hjálmarsson (1990), bls. 143-146.
• 3
  Jón I. Jónsson (1964, 4. september). Sigdór V. Brekkan kennari, Neskaupstað. Morgunblaðið, 51. árg., 206. tbl., bls. 17; Þorsteinn Þ. Viglundsson (1969), bls. 392; Vilhjálmur Hjálmarsson (1990), bls. 160-161.