Grundargata 5, Siglufirði

Skafti Jónsson var vígður til Siglufjarðarkirkju í júlí 1878. Hann settist þó ekki að á prestssetrinu Hvanneyri fyrr en árið 1881 (húsið nr. 45 við Hvanneyrarbraut nefnist Hvanneyri og stendur á bæjarhól gömlu Hvanneyrar). Hann fór fljótlega að berjast fyrir því að fá að byggja þar nýtt íbúðarhús, en bæði gekk erfiðlega að fá leyfi og fjármagn til byggingarinnar. Hann byrjaði á því að endurbyggja gamla torfbæinn en honum tókst þó að lokum að byggja lítið timburhús framan við bæinn árið 1886 að því að talið er og var það fyrsta timburhúsið sem þar var byggt. Honum auðnaðist þó ekki að búa lengi í húsinu, því hann lést af hjartaslagi 24. júlí 1887 og mun þá húsinu tæpast að fullu lokið þó hann hafi verið farinn að búa í því ásamt eiginkonu sinni Dagbjörtu Guðmundsdóttur. „Eitthvert þras varð um þetta hús og skuld, sem á því hvíldi“ þegar Skafti féll frá og eftirmaður hans, séra Bjarni Þorsteinsson, vildi ekki kaupa húsið. Húsið var að lokum selt Snorra Grímssyni trésmið árið 1894. Hann lét flytja það niður á Eyri árið eftir, þar sem hann hafði gengið frá grunni undir húsið. Húsið var flutt í heilu lagi á hjarni og komið fyrir á grunninum. Snorri bjó þó aldrei sjálfur í húsinu, heldur leigði það. Barði Barðason (1865-1948) bjó í húsinu til ársins 1913 ásamt konu sinni Ingibjörgu Þorleifsdóttur (1867-1949) og var húsið þá kennt við hann og kallað Barðahús. Barði stundaði sjómennsku og seglasaum og var um tíma með eigin mótorbát.

Síðan bjó Kjartan Jónsson, Jón Jóhannesson skipstjóri og Baldvin Hansson í húsinu.

Húsið stóð við Grundargötu, ýmist skráð númer 5, 5a eða 5b. Undir lokin var orðið hluti af verkstæði Jóhanns Jóhannssonar rafvirkjameistara, líklega nýtt sem geymsla. Það var rifið á níunda áratug síðustu aldar.¹Sigurjón Sigtryggsson (1986). Frá Hvanndölum til Úlfsdala. Þættir úr sögu Hvanneyrarhrepps. 3 bindi, bls. 686-691 og 868-869. Reykjavík: Sögusteinn; Bjarni Þorsteinsson (1918). Siglufjarðarverzlunarstaður hundrað ára 1818 – 20. maí – 1918. Aldar­minning. Ágrip af sögu kauptúns og sveitar, bls. 53-54 og 61. Reykjavík: Gutenberg; Harpa Grímsdóttir (1998, desember). Byggingarár húsa á Siglufirði, bls. 15. Reykjavík: Veðurstofa Íslands; Örlygur Kristfinnsson (2010, 15. maí). Munnleg heimild; Örlygur Kristfinnsson (2023). Fólkið á Eyrinni. Smámyndir og þættir, bls. 326. Siglufirði: Söluturninn; Bjarni Þorsteinsson (1918). Siglufjarðarverzlunarstaður hundrað ára 1818 – 20. maí – 1918. Aldar­minning. Ágrip af sögu kauptúns og sveitar, bls. 61. Reykjavík: Gutenberg; Miðstöð stafrænna hugvísinda og lista. (2025). Barðahús, Hvanneyrarsókn, Hvanneyrarhreppi í Eyjafjarðarsýslu. Sögulegt mann- og bæjatal, útg. 1.0. Sótt 29. júlí 2025 frá https://smb.mshl.is/baer/9924.

Leitarorð: Siglufjörður

Höfundur: Guðlaug Vilbogadóttir.
Síðast uppfært 29. júlí, 2025

Heimildaskrá

• 1
  Sigurjón Sigtryggsson (1986). Frá Hvanndölum til Úlfsdala. Þættir úr sögu Hvanneyrarhrepps. 3 bindi, bls. 686-691 og 868-869. Reykjavík: Sögusteinn; Bjarni Þorsteinsson (1918). Siglufjarðarverzlunarstaður hundrað ára 1818 – 20. maí – 1918. Aldar­minning. Ágrip af sögu kauptúns og sveitar, bls. 53-54 og 61. Reykjavík: Gutenberg; Harpa Grímsdóttir (1998, desember). Byggingarár húsa á Siglufirði, bls. 15. Reykjavík: Veðurstofa Íslands; Örlygur Kristfinnsson (2010, 15. maí). Munnleg heimild; Örlygur Kristfinnsson (2023). Fólkið á Eyrinni. Smámyndir og þættir, bls. 326. Siglufirði: Söluturninn; Bjarni Þorsteinsson (1918). Siglufjarðarverzlunarstaður hundrað ára 1818 – 20. maí – 1918. Aldar­minning. Ágrip af sögu kauptúns og sveitar, bls. 61. Reykjavík: Gutenberg; Miðstöð stafrænna hugvísinda og lista. (2025). Barðahús, Hvanneyrarsókn, Hvanneyrarhreppi í Eyjafjarðarsýslu. Sögulegt mann- og bæjatal, útg. 1.0. Sótt 29. júlí 2025 frá https://smb.mshl.is/baer/9924.