Eiríkshús, Reyðarfirði

Ekki er mikið vitað um hús sem nefnt var Eiríkshús á Reyðarfirði. Sagt er að húsið hafi verið reist sem sjóhús í Breiðuvík, sem er í utanverðum Reyðarfirði, norðan megin.  Þaðan var mikið útræði á árum áður, bæði frá Litlu- og Stóru-Breiðuvík og er þar að finna fjölmörg ummerki eftir sjóhús og önnur mannvirki sem tengjast sjávarútvegi. Sjóhúsið var flutt inn á Reyðarfjörð og reist „niðri í fjöru innarlega undir Oddnýjar­heiðinni út og niður af Sandgerði.“¹Guðmundur Magnússon (2003). Saga Reyðarfjarðar 1883-2003, bls. 100. Fjarðabyggð: Fjarða­byggð. Árin 1917 til 1919 voru hjónin Eiríkur Hansson Beck (1876-1950) og Margrét Guðmundsdóttir (1891-1982) eigendur hússins og þar til heimilis og í því bjó þá einnig Þorsteinn Pálsson og kona hans Áslaug Pétursdóttir Maack.²Guðmundur Magnússon (2003), bls. 100; Guðný Zoëga (2023). Stóra-Breiðuvík og Stóra-Breiðuvíkurhjáleiga í Reyðarfirði – fornleifaskráning; Guðný Zoëga (2023). Litla-Breiðuvík í Reyðarfirði – fornleifaskráning.

Í vesturendanum var netaloft, sett upp línutau og gengið frá ýmsum góðum hlutum. Niðri var aðgerð í austurendanum og salt og saltgeymsla í körum. Þar var fiskinum stakkað og þar var hann pakkaður. …
Í fasteignamatinu 1917 segir, að húsið sé 71 m² að grunnfleti, „… timburhús með kvist á annarri hlið, þakið járnvarið. Húsið er útbúið til íbúðar og sjósóknar með bátabryggju í flæðarmáli.“³Guðmundur Magnússon (2003), bls. 110.

Margrét og Eiríkur hófu sinn búskap uppi á lofti í sjóhúsinu, sem kennt var við Eirík og kallað Eiríkshús. Þar hafði Eiríkur komið sér upp aðstöðu til útgerðar og fiskverkunar, en hann var sjómaður og útgerðarmaður, auk þess sem hann var kennari um tíma.

„Þetta þættu sjálfsagt ekki merkileg húsakynni í dag, en þetta varð að nægja, í önnur hús var ekki að venda um sinn. Síðar fluttu fjölskyldumar svo í eigin húsnæði, Seylu og Ekru. Margrét og Eirikur eignuðust tvö börn.“⁴Guðmundur Magnússon (1982, 7. júlí). Margrét Guðmundsdóttir Beck frá Reyðarfirði. Minning. Íslendingaþættir Tímans, 26. tbl., bls. 1.

Höfundur: Guðlaug Vilbogadóttir.
Síðast uppfært 12. febrúar, 2026

Heimildaskrá

• 1
  Guðmundur Magnússon (2003). Saga Reyðarfjarðar 1883-2003, bls. 100. Fjarðabyggð: Fjarða­byggð.
• 2
  Guðmundur Magnússon (2003), bls. 100; Guðný Zoëga (2023). Stóra-Breiðuvík og Stóra-Breiðuvíkurhjáleiga í Reyðarfirði – fornleifaskráning; Guðný Zoëga (2023). Litla-Breiðuvík í Reyðarfirði – fornleifaskráning.
• 3
  Guðmundur Magnússon (2003), bls. 110.
• 4
  Guðmundur Magnússon (1982, 7. júlí). Margrét Guðmundsdóttir Beck frá Reyðarfirði. Minning. Íslendingaþættir Tímans, 26. tbl., bls. 1.