Brandshús, Miklaholtsseli, Eyja- og Miklaholtshreppi

Í húsakönnun Eyja- og Miklaholtshrepps segir m.a.:

Árið 1991 var húsið Vestur-Bakki flutt í Miklaholtssel frá Akranesi. Húsið var byggt á Akranesi rétt við Slippinn (Bakkatún 24, áður Strandgötu) árið 1926. Sá sem lét reisa það var Einar Ingjaldsson skipstjóri á Akranesi. Hann bjó sjálfur í húsinu, Síðar bjuggu þar synir hans tveir, fyrst Júlíus og síðan Helgi. Húsið stóð autt á Akranesi þegar það var flutt í Miklaholtssel. Núverandi eigandi er Guðjón Jensson, búsettur í Noregi.¹Teiknistofa Guðrúnar Jónsdóttur (2014, maí). Eyja- og Miklaholtshreppur. Húsa- og mannvirkjakönnun 2012-2014, bls. 29. Sótt 1. september 2023 af https://husakannanir.minjastofnun.is/Husakonnun_136.pdf

Þetta mun ekki vera allskostar rétt, því það mun hafa verið Júlíus Einarsson (1902-1973) skipstjóri, sonur Einars Ingjaldssonar, sem byggði Vestri-Bakka á Akranesi. Þar bjó hann lengi með eiginkonu sinni, Ragnheiði K. Björnsdóttur (1904-1996) og sjö börnum þeirra, sem öll fæddust í húsinu á árunum 1927 til 1945. Öll voru þau kennd við Bakka (en ekki Vestri-Bakka). Einar Ingjaldsson byggði hins vegar annað hús á Skaganum árið 1922. Það hús stendur enn og er númer 22 við Bakkatún.²Birna G. Hjaltadóttir (2023, 5. september). Tölvupóstur.

Svo virðist sem húsið hafi fengið nafnið Brandshús þegar það var flutt í Miklaholtssel, sem nefnt er Sel í daglegu tali.³Axel Kaaber, Bergþóra Gróa Kvaran, Birkir Ingibjarsson o.fl. (2012). Eyðibýli á Íslandi, 3. bindi: Rannsókn á eyðibýlum og yfirgefnum húsum í Dalasýslu, Snæfells- og Hnappadalssýslu, Mýrasýslu og Borgarfjarðarsýslu sumarið 2012, bls. 84. Reykjavík: Eyðibýli – áhugamannafélag.

Í fyrrnefndri húsakönnun er húsinu lýst þannig:

Húsið er járnklætt timburhús á steyptum sökkli, 1 hæð og ris. Mænir er yfir miðju húsi. Stigahús gengur út úr húsinu með einhalla þaki. Húsið hefur aldrei verið íbúðarhæft frá því það var flutt í Miklaholtssel og hefur ekkert verið notað. Þar stendur það opið fyrir vindi og úrkomu og orðið hrörlegt. Húsið er lóðarsamningslaust.⁴Teiknistofa Guðrúnar Jónsdóttur (2014, maí), bls. 29.

Höfundur: Guðlaug Vilbogadóttir.
Síðast uppfært 20. janúar, 2024

Heimildaskrá

• 1
  Teiknistofa Guðrúnar Jónsdóttur (2014, maí). Eyja- og Miklaholtshreppur. Húsa- og mannvirkjakönnun 2012-2014, bls. 29. Sótt 1. september 2023 af https://husakannanir.minjastofnun.is/Husakonnun_136.pdf
• 2
  Birna G. Hjaltadóttir (2023, 5. september). Tölvupóstur.
• 3
  Axel Kaaber, Bergþóra Gróa Kvaran, Birkir Ingibjarsson o.fl. (2012). Eyðibýli á Íslandi, 3. bindi: Rannsókn á eyðibýlum og yfirgefnum húsum í Dalasýslu, Snæfells- og Hnappadalssýslu, Mýrasýslu og Borgarfjarðarsýslu sumarið 2012, bls. 84. Reykjavík: Eyðibýli – áhugamannafélag.
• 4
  Teiknistofa Guðrúnar Jónsdóttur (2014, maí), bls. 29.