Bergstaðastræti 50 B, Reykjavík

Saga þessa húss hófst árið 1884 við Klapparstíg í Reykjavík þegar Steindóri Jónssyni snikkara var veitt leyfi til að byggja þar timburhús. Hann lauk þó ekki smíðinni fyrr en árið 1887. Þá var húsið 9 x 8 ½ ál. að stærð úr bindingi sem múrað var upp í. Á hæðinni voru 3 herbergi auk eldhúss, sem öll voru þiljuð með borðum. Á loftinu voru 2 herbergi þiljuð með borðum og var lítill ofn í öðru herberginu en eldavél í hinu.

Árið 1909 seldi Steindór snikkari trésmiðjunni Völundi hús sitt, en athafnasvæði trésmiðjunnar var skammt frá og árið 1927 keypti Guðmundur S. Guðmundsson verkstjóri í Héðni húsið til að flytja á Bergstaðastíg, sem síðar nefndist Bergstaðastræti og fékk húsið númerið 50B, en það stendur á baklóð við götuna. Flutningurinn þótti mikið ævintýri á sínum tíma sem margir fylgdust með og tók heila þrjá daga.¹Bakhús við Bergstaðastræti: Aldargamalt og aldrei fallegra (1984, 12.-18. júlí). Vikan, 28. tbl., 46. árg., bls. 3-6. Í þessari klausu í Alþýðublaðinu 8. júní 1927 kemur fram að húsið hafi verið dregið af götuþjappara²Hús flutt (1927, 8. júní). Alþýðublaðið, bls. 4.:

Guðmundur byggði við húsið á nýja staðnum og þegar húsið var virt árið 1942 var húsið á steyptum kjallara með 2 herbergjum, eldhúsi, geymslum, vatnssalerni og þvottaherbergi. Á hæðinni voru 4 íbúðarherbergi og búið að setja þar baðherbergi, en á loftinu voru 2 íbúðarherbergi og þurrkloft. Steinsteyptur inn­göngu­­­­skúr var þá við húsið.³Minjasafn Reykjavíkur (ódags.). Húsaskrá. Bergstaðastræti 50 B.

Bergstaðastræti 50 B, 2009. Ljósm.: Höfundur.

Höfundur: Guðlaug Vilbogadóttir.
Síðast uppfært 14. desember, 2023

Heimildaskrá

• 1
  Bakhús við Bergstaðastræti: Aldargamalt og aldrei fallegra (1984, 12.-18. júlí). Vikan, 28. tbl., 46. árg., bls. 3-6.
• 2
  Hús flutt (1927, 8. júní). Alþýðublaðið, bls. 4.
• 3
  Minjasafn Reykjavíkur (ódags.). Húsaskrá. Bergstaðastræti 50 B.