Bakkagerði í landi Ölvers undir Hafnarfjalli

Árið 1904 fluttu hjónin Guðrún Ívarsdóttir (1878-1927) og Hallgrímur Jónsson (1872-1959) úr Reykholtsdal að Bakkagerði á Akranesi. Árið 1909 byggði Hallgrímur lítið timburhús í Bakkagerði. Húsið var ein hæð með háu risi og stóð á grjóthlöðnum kjallara. Stærð þess var tæplega 30 m². Við vesturhlið var lítill inngangsskúr, en geymsluskúr með allri suðurhliðinni. Húsið taldist síðar til Suðurgötu, en var nær bakkanum en næstu hús, sem voru númer 102 og 104 við Suðurgötu.

Árið 1934 keypti Samson Jónsson (1873-1941) frá Kalastöðum Bakkagerði af þeim Hallgrími og Guðrúnu og bjó í því til ársins 1939. Árið áður höfðu hjónin Karl Magnússon (1899-1963) og Guðrún Sigurðardóttir (1882-1941) keypt húsið. Guðrún lést árið 1941, en Karl bjó í húsinu með ráðskonu sinni, Steinunni Skúladóttur, þar til hann lést árið 1963. Gísli S. Sigurðsson telur að ekki hafi verið búið í húsinu eftir það, en um 1970 var það flutt í sumarbústaðabyggð í landi Ölvers undir Hafnarfjalli. Risið var tekið af húsinu, en sett í þess stað skúrþak á húsið og húsið notað þar sem sumarbústaður.¹Ólafur B. Björnsson (1955, 1. apríl). Hversu Akranes byggðist. 4. kafli. – 870-1900. – Byggingar batna. Akranes, 4.-6. tbl., bls. 50-51; Gísli S. Sigurðsson (2010). Svipast um á Suðurgötu. IV. hluti. Árbók Akurnesinga 2010, 10. árg., bls. 140; Pétur Ottesen (1963, 20. apríl). Karl Magnússon Bakkagerði. Morgunblaðið, 50. árg., 89. tbl., bls. 16. Byggingarár hússins er skráð 1971 í fasteignaskrá og það sagt vera 36,5 m².

Ekki er með vissu vitað hver flutti húsið í Ölver, en ekki er ólíklegt að það hafi verið Gísli Pálsson (1919-2012), rafvirki á Akranesi, a.m.k. eru til heimildir fyrir því að hann seldi Þórnýju Elísdóttur (f. 1942) húsið í júlí 1992.²Ingibjörg J. Ingólfsdóttir (2023, 25. júlí). Munnleg heimild. Núverandi eigandi hússins keypti það árið 2011.

Nafn hússins, Bakkagerði, flutti með húsinu og enn ber bústaðurinn það nafn.

Höfundur: Guðlaug Vilbogadóttir.
Síðast uppfært 20. janúar, 2024

Heimildaskrá

• 1
  Ólafur B. Björnsson (1955, 1. apríl). Hversu Akranes byggðist. 4. kafli. – 870-1900. – Byggingar batna. Akranes, 4.-6. tbl., bls. 50-51; Gísli S. Sigurðsson (2010). Svipast um á Suðurgötu. IV. hluti. Árbók Akurnesinga 2010, 10. árg., bls. 140; Pétur Ottesen (1963, 20. apríl). Karl Magnússon Bakkagerði. Morgunblaðið, 50. árg., 89. tbl., bls. 16.
• 2
  Ingibjörg J. Ingólfsdóttir (2023, 25. júlí). Munnleg heimild.