Aðalstræti 21, Þingeyri

Síðasta dag marsmánaðar árið 1917 birtist í Ísafold það þakkarávarp sem hér sést frá Jónu Hafliða­dóttur (f. 1865), ekkju Hermanns Bjarna Kristjánssonar, sem látist hafði tveimur árum áður frá fimm börnum.¹Jóna Hafliðadóttir (1917, 31. mars). Þakkarávarp. Ísafold, 44. árg., 22. tbl., bls. 4. Eftir lát Hermanns flutti Jóna frá Ketilseyri í Dýrafirði, réð sig til vinnu út á Þingeyri til Proppébræðra. Áður en hús hennar var flutt fékk hún húsaskjól í einu af húsum þeirra bræðra.²Þórir Guðmundsson, Þingeyri (2010, 1. nóvember). Munnleg heimild.

Velgjörðarmenn ekkjunnar, bræðurnir Carl Friedrich (1876-1942), Jón Adolph (1879-1948), Anton Wilhelm (1885-1963), Ólafur Jóhann (1886-1949) og Jóhannes Harald Proppé (1888-1918) voru synir hjónanna Helgu Jónsdóttur (1848-1925) og Claus Eggert Dietrich Proppé (1839-1898), sem fæddur var í Holstein í Þýskalandi en kom hingað til lands árið 1868 og rak lengst af brauð­gerðar­hús í Hafnarfirði. Árið 1914 stofnuðu þeir verslunar- og útgerðarfyrirtæki á Þingeyri, sem þeir störfuðu allir að einhverju leyti við til ársins 1926 þegar fyrirtækið varð gjaldþrota. Ólafur, sá sem hafði forgöngu um aðstoðina við Jónu, var framkvæmdastjóri fyrirtækis­ins og sat á þingi fyrir Vestur-Ísafjarðarsýslu á árunum 1919 til 1923.³Ólafur Proppé (1993). Proppéættin á Íslandi. Niðjatal Helgu Jónsdóttur Proppé og Clausar Eggert Dietrichs Proppé auk ýmiss fróðleiks um sögu ættarinnar. Gefið út af tilefni af ættarmóti Proppéættarinnar á Íslandi 28. ágúst 1993.. Þess má geta að þegar Anton Proppé flutti til Reykjavíkur árið 1947 lét hann rífa nokkur hús sem hann átti á Þingeyri, þ. á m. „faktorshúsið“ og notaði efniviðinn til að byggja þrjú hús við Skipasund (Ólafur Proppé, 1993:19 og 24).

Hús Jónu var sett niður á lóð sem nú er lóð nr. 21 við Aðal­stræti þar sem það stendur enn.⁴Þórir Guðmundsson, Þingeyri (2010, 1. nóvember). Munnleg heimild.

Leitarorð: Dýrafjörður

Höfundur: Guðlaug Vilbogadóttir.
Síðast uppfært 3. september, 2025

Heimildaskrá

• 1
  Jóna Hafliðadóttir (1917, 31. mars). Þakkarávarp. Ísafold, 44. árg., 22. tbl., bls. 4.
• 2
  Þórir Guðmundsson, Þingeyri (2010, 1. nóvember). Munnleg heimild.
• 3
  Ólafur Proppé (1993). Proppéættin á Íslandi. Niðjatal Helgu Jónsdóttur Proppé og Clausar Eggert Dietrichs Proppé auk ýmiss fróðleiks um sögu ættarinnar. Gefið út af tilefni af ættarmóti Proppéættarinnar á Íslandi 28. ágúst 1993.. Þess má geta að þegar Anton Proppé flutti til Reykjavíkur árið 1947 lét hann rífa nokkur hús sem hann átti á Þingeyri, þ. á m. „faktorshúsið“ og notaði efniviðinn til að byggja þrjú hús við Skipasund (Ólafur Proppé, 1993:19 og 24).
• 4
  Þórir Guðmundsson, Þingeyri (2010, 1. nóvember). Munnleg heimild.