Aðalbraut 63, Raufarhöfn

Heiti: Hóll – Hóll II - Höfði - Höfðahúsið - Litli-Hóll

Byggingarár: ≈ 1910

Rifið: ≈ 1970

Upphafleg notkun: Íbúðarhús

Fyrsti eigandi: Friðgeir Guðnason og Þorbjörg Stefánsdóttir / Steingrímur Guðnason og Sigríður Björg Þorsteinsdóttir ?

Aðrir eigendur:

1922: Friðrik Guðnason og Þorbjörg Björnsdóttir

1927: Árni Pálsson og Friðný Elísabet Þórarinsdóttir

1952: Páll Árnason og Una Hólmfríður Kristjánsdóttir

Upphafleg staðsetning: Hól, síðar Höfði, Melrakkasléttu

Flutt: 1952 að Aðalbraut 63 á Raufarhöfn

Hvernig flutt: Tekið niður

Höfðahúsið, nokkuð komið til ára sinna. Heimild: Níels Árni Lund (2016). Sléttunga II. Safn til sögu Melrakkasléttu. Fólk og býli, bls. 309. Reykjavík: Skrudda ehf.

Lengst til hægri á þessari ljósmynd frá 1952 er húsið númer 65 við Aðalbraut á Raufarhöfn. Næsta hús til vinstri er Aðalbraut 63, Höfði, sem nú er horfið. Ljósm.: Hreinn Helgason. Ljósmynd úr safni Jónasar Hreinssonar. (Smellið á myndina til að stækka hana.)

Saga:

Til er ljósmynd (sjá að ofan) af heimilisfólkinu á Hóli á Melrakkasléttu, sem tekin er nokkru fyrir árið 1914. Hægra megin á myndinni er hús, sem nefnt er Höfðahúsið, og virðist vera í góðu ástandi, jafnvel tiltölulega nýreist. Á myndinni eru m.a. þau Guðni Kristjánsson (1844-1914) og Friðný Sabína Friðriksdóttir (1861-1936). Guðni hafði keypt jörðina um áramótin 1877 til 1878. Þá var hann kvæntur Helgu Þórarinsdóttir (1854-1879), en hún andaðist á fyrsta ári sínu á Hóli, en tveimur árum síðar kvæntist Guðni Friðnýju.

Árið 1909 tók Friðgeir Guðnason (1886-1914) við ábúð á Hóli ásamt konu sinni Þorbjörgu Stefánsdóttur (1878-1953). Þau bjuggu þó aðeins þrjú ár á Hóli, því Friðgeir lést árið 1914, sama ár og faðir hans.

Árið 1911 hóf Steingrímur Guðnason (1884-1958), bróðir Friðgeirs, einnig búskap á Hóli, ásamt konu sinni Sigríði Björg Þorsteinsdóttur (1891-1982).

Ekki liggur fyrir hver þeirra feðga byggði nýtt íbúðarhús á Hóli, en líklegt má telja að það hafi verið annað hvor bróðurinn en foreldrar þeirra hafi áfram búið í gamla íbúðarhúsinu.

Hólsjörðinni var skipt í þrennt árið 1922, þ.e. í Vog, Hól og Hól II, sem fékk nafnið Höfði árið 1950.

Fyrstu ábúendur á Hóli II voru hjónin Friðrik Guðnason (1889-1932), eitt barna Guðna og Friðnýjar á Hóli, og kona hans Þorbjörg Björnsdóttir (1900-1983). Þau seldu þeim Árna Pálssyni (1899-1990) og Friðnýju Elísabetu Þórarinsdóttur (1903-1983) jörðina árið 1927. Þegar þau byggðu nýtt íbúðarhús á jörðinni árið 1950 breyttu þau nafni jarðarinnar í Höfða.

Þegar nýja íbúðarhúsið var risið rifu þau Páll Hjaltalín Árnason (1927-1999), sonur þeirra Árna og Friðnýjar, og Una Hólmfríður Kristjánsdóttir (f. 1931) gamla húsið og reistu það að nýju á Raufarhöfn.¹ Páll var útgerðarmaður og sveitarstjóra á Raufarhöfn.²

Í viðtali við Unu í nóvember 2025 kom fram að húsið hefði staðið mjög nálægt núverandi bæjarhúsum á Hóli, alveg við þjóðveginn. Þegar húsið var flutt var það tekið niður um 1952 og flutt að Aðalbraut 63 á Raufarhöfn. Þar var húsið reist að nýju í svipaðri mynd og það hafði verið. Þau Páll bjuggu í húsinu til ársins 1963. Þau höfðu hugsað sér að stækka gamla húsið, en féllu frá þeirri hugmynd og reistu sér nýtt hús og seldu það gamla. Búið var í húsinu þar til það var rifið um eða eftir 1990. Húsið var nefnt Litli-Hóll meðan það var á Raufarhöfn.³

Höfundur: Guðlaug Vilbogadóttir.
Síðast uppfært 10. nóvember, 2025

Heimildaskrá

1
Níels Árni Lund (2016). Sléttunga II. Safn til sögu Melrakkasléttu. Fólk og býli, bls. 295-308. Reykjavík: Skrudda ehf.
2
Snorri G. Sigurðsson, héraðsskjalavörður (2025, 14. október). Tölvupóstur.
3
Una Hólmfríður Kristjánsdóttir (2025, 7. nóvember). Munnleg heimild; Raufarhöfn.net (2025, 9. nóvember). Sótt 10. nóvember 2025 af https://www.facebook.com/groups/raufarhofn/permalink/10163161955823536/.

Deila færslu

Höfundur: Guðlaug Vilbogadóttir.
Síðast uppfært 10. nóvember, 2025