Grund, Skötufirði, Súðavíkurhreppi

Heiti: Grund

Byggingarár: ≈ 1935

Upphafleg notkun: Verkstæði - bílskúr

Fyrsti eigandi: Póstur og sími

Aðrir eigendur:

? : Þorsteinn Jóakimsson

1977: Jóhannes Þórarinsson og Margrét Magnúsdóttir / Halldór Guðmundsson og Hildur Jóhannesdóttir

Upphafleg staðsetning: Aðalstræti 18, Ísafirði

Fyrst flutt: Á Torfnes, Ísafjarðarkaupstað

Flutt: 1977 að Grund í Skötufirði

Hvernig flutt: Fyrst á bíl og síðan fleytt á tunnum og dregið með bát

Símaskúrinn á leið að Grund. Ljósm. í eigu Kristjönu Jóhannesdóttur.

Grund í Skötufirði í ágúst 2025. Ljósm.: Höfundur.

Saga:

Í austanverðum Skötufirði í Ísafjarðardjúpi stendur notalegur sumarbústaður, þar sem áður var bærinn Grund. Húsi þessu var fleytt á tunnum frá Ísafjarðarkaupstað um 1977. Eftir því sem næst verður komist var húsið eða skúrinn upphaflega byggður sem verkstæði og bílskúr fyrir símstöðvarstjóra á lóð símstöðvarinnar á Ísafirði, sem var til húsa í reisulegu húsi við Aðalstræti 18 á Ísafirði frá árinu 1933. Byggingarár skúrsins er ekki þekkt, en líklega var hann byggður skömmu eftir að símstöðin tók til starfa í Aðalstrætinu.

Þegar ekki var lengur þörf fyrir skúrinn í Aðalstrætinu var hann fluttur á Torfnes á Ísafirði, og stóð þar örstutt innan við rækjuverksmiðjuna sem þar starfaði. Hún var staðsett þar sem nú er bílastæði á milli sjúkrahússins og íbúða aldraðra í Hlíf. Þar notaði Þorsteinn Jóakimsson (1920-2011) bifreiðarstjóri hann sem bílskúr, en hann bjó þá á Urðarvegi 4, sem er ofan við Torfnesið.

Árið 1977 keyptu hjónin Jóhannes Þórarinsson (1906-1998) og Margrét Magnúsdóttir (1916-1992) ásamt tengdasyni sínum og dóttur skúrinn til að flytja hann á Grund í Skötufirði, þar sem þau höfðu búið á árunum 1937 til 1946.

Fyrst var skúrinn fluttur á vagni eftir götum Ísafjarðarbæjar niður í fjöru við Neðstakaupstað, þar sem honum var bakkað eins langt og hægt var út í sjó. Settar voru tunnur undir húsið og á næsta flóði fór húsið á flot. Síðan var húsið dregið sem leið liggur í Skötufjörð. Ekki var hægt að fara landleiðina með húsið því göngin undir Arnarneshamar voru of þröng. Í Skötufirði var húsið dregið með jarðýtu úr fjörunni upp á kambinn þar sem það virðist una hag sínum vel og er nýtt á hverju sumri.¹

Leitarorð: Skötufjörður

Höfundur: Guðlaug Vilbogadóttir.
Síðast uppfært 29. september, 2025

Heimildaskrá

1
Kristjana Jóhannesdóttir (2025, 25. ágúst). Munnleg heimild; Jón Þ. Þór (1990). Saga Ísafjarðar og Eyrarhrepps hins forna. IV bindi. 1921-1945, bls. 116. Ísafirði: Sögufélag Ísfirðinga; Gunnar Frímannsson (ódags.). Petrína og systurnar frá Látrum. Sótt 4. september 2025 af https://www.gunnarf.is/is/aettmennin-2/moduraettin/barna-beta/petrina-og-systurnar-fra-latrum; Bjarni Garðarsson (2025, 11. september). Munnleg heimild; Rósa Þorsteinsdóttir (2025, 11. september). Munnleg heimild; Halldór Guðmundsson (2025, 15. september). Munnleg heimild.

Deila færslu

Höfundur: Guðlaug Vilbogadóttir.
Síðast uppfært 29. september, 2025