Skipasund 41, Reykjavík

Í fasteignaskrá er húsið sem nú stendur við Skipasund 41 í Reykjavík sagt byggt árið 1946. Það mun þó vera mun eldra, því árð 1945 var það flutt þangað frá Hverfisgötu 78 í Reykjavík. Þetta kemur fram á teikningu sem undirrituð var af Guðmundi H. Þorlákssyni (1887-1958) húsameistara í júní 1945.¹Teikningavefur Reykjavíkurborgar. Skipasund 41. Teikn. dags. í júní 1945. Sótt 7. maí 2025 af https://skjalasafn.reykjavik.is/fotoweb/.

Húsið var byggt við Hverfisgötu 78 árið 1902. Fyrsti eigandi þess var Kristinn Guðmundsson. Húsið var einloftað, byggt af bindingi, klætt utan með plægðum borðum, pappa og járni þar yfir. Risþak var á húsinu, klætt járni. Niðri í húsinu voru 3 herbergi og eldhús, allt þiljað og málað og herbergin með panelpappa innan á þiljum og neðan á loftum, sem voru tvöföld. Þar voru tveir ofnar og eldavél. Uppi voru tvö herbergi og framloft, allt þiljað og málað og berbergin með panelpappa innan á þiljum. Þar voru tvær eldavélar. Kjallari, sem hólfaður var í fernt, var undir öllu húsinu.

Við suðurhlið hússins var inngönguskúr, byggður eins og húsið, þiljaður innan og málaður.

Grunnflötur hússins var um 28 fermetrar og við hann bættist skúrinn, sem var um 7 fermetrar.²Borgarskjalasafn Reykjavíkur. Brunabótavirðingar. Bók 02-04-1900 til 13-11-1905. Aðfnr. 735. Brunabótanr. 655.

Húsið stóð nyrst á lóðinni, alveg við götuna, en á suðurhluta lóðarinnar var hús úr steinsteypu, sem hýsti lengi bifreiðaverkstæði. Nýbúið var að breyta því í bókagerðarhús, þegar gamla íbúðarhúsið frá 1902 var flutt að Skipasundi 41 í Reykjavík. Þar stendur húsið enn og ber svip gamla timburhússins, en um 2004 var stór einnar hæðar viðbygging byggð við bakhlið hússins.³Borgarsögusafn. Húsaskrá Reykjavíkur;  Teikningavefur Reykjavíkurborgar. Skipasund 41. Teikn. dags.  7. mars. 2004. Sótt 7. maí 2025 af https://skjalasafn.reykjavik.is/fotoweb/.

Höfundur: Guðlaug Vilbogadóttir.
Síðast uppfært 7. maí, 2025

Heimildaskrá

• 1
  Teikningavefur Reykjavíkurborgar. Skipasund 41. Teikn. dags. í júní 1945. Sótt 7. maí 2025 af https://skjalasafn.reykjavik.is/fotoweb/.
• 2
  Borgarskjalasafn Reykjavíkur. Brunabótavirðingar. Bók 02-04-1900 til 13-11-1905. Aðfnr. 735. Brunabótanr. 655.
• 3
  Borgarsögusafn. Húsaskrá Reykjavíkur;  Teikningavefur Reykjavíkurborgar. Skipasund 41. Teikn. dags.  7. mars. 2004. Sótt 7. maí 2025 af https://skjalasafn.reykjavik.is/fotoweb/.