Aðalgata 19, Keflavík

Rétt fyrir jól árið 1949 gerði Magnús Ketilsson (1896-1965) leigusamning við eiganda landareignarinnar Keflavík um lóð undir um 40 fermetra íbúðarhús við Aðalgötu 19 í Keflavík, sem flutt hafði verið frá Höfnum í Hafnarhreppi. Magnúsi var heimilt að rækta lóðina að vild, en ekki byggja nein önnur mannvirki á lóðinni án sérstaks leyfis landeiganda og ekki reka verslun í húsinu. Ekki verður annað séð en Magnús hafi búið í húsinu þegar samningurinn er gerður, enda kemur það heim og saman við heimildir um að húsið hafi verið flutt til Keflavíkur árið 1947.¹Leigusamningur, dags. 22. desember 1949. Sóttur 26. september 2020 af https://vefuppfletti.fasteignaskra.is/leit; Helga Margrét Guðmundsdóttir (2020, 20. ágúst). Tölvupóstur.

Magnús ólst upp í Höfnum og var þar lengi formaður og varð fyrstur til að gera þaðan út vélbát. Hann sat í hreppsnefnd og var fyrsti formaður Björgunarsveitarinnar Eldeyjar þegar hún var stofnuð árið 1931. Eftir að hann flutti til Keflavíkur starfaði hann sem vörubílstjóri. Eiginkona hans var Guðbjörg Friðriksdóttir (1987-1978), sem ættuð var úr Reykjavík.²Jón Þ. Þór (2003). Hafnir á Reykjanesi. Saga byggðar og mannlífs í ellefu hundruð ár, bls. 184. Reykjanesbær: Reykjanesbær; Leó M. Jónsson (1991, 1. desember). Slysavarnadeildin Eldey í Höfnum 60 ára. Ágrip af sögu deildarinnar. Faxi, 51. árg., 7. tbl., bls. 203.

Sigríður Einarsdóttir (1929-2019) sem átti húsið í 48 ár frá árinu 1964 ásamt manni sínum Sigurði Guðbrandssyni (1923-2014) hefur sagt frá því að hún hafi heyrt að húsið hefði verið byggt í Höfnum og að það hafi verið flutt þar til. Þar hafi húsið verið kallað Bakki og kemur það heim og saman við aðrar heimildir, því Magnús Ketilsson útvegsbóndi var kenndur við Bakka. Hún sagði einnig frá því að húsið var flutt í heilu lagi til Keflavíkur árið 1947, en þegar unnið var að viðhaldi við húsið eftir að það kom þangað, sást að nánast allur viður í húsinu hafi verið merktur, og því ekki ósennilegt að það hafi verið tekið í sundur þegar það var flutt í Höfnum.³Helga Margrét Guðmundsdóttir (2017, 11. janúar). Minnisblað um Aðalgötu 19. M.a. upplýsingar úr viðtali við Sigríði Einarsdóttur; Leó M. Jónsson (1991, 1. desember), bls. 203.

Aðalgata 19, Keflavík, í ágúst 2025. Ljósm.: Höfundur.

Dóttir, Sigríðar, Ragnhildur Sigurðardóttir (f. 1952), segir frá því í viðtali að ætíð hafi verið talað um að viðir hússins væru úr timburflutningaskipinu Jamestown, sem strandaði utan við Hafnir 26. júní 1881. Sé það rétt má ætla að húsið hafi verið byggt skömmu eftir það.⁴Marta Eiríksdóttir (2019, 13. september). Gott að flytja heim aftur. Sótt 26. september 2020 af https://www.vf.is/mannlif/gott-ad-flytja-heim-aftur.

Tekið skal fram að í Fasteignaskrá er byggingarár hússins sagt vera árið 1930. Ekki liggja fyrir heimildir um hvers vegna svo er.

Leitarorð: Reykjanesbær

Höfundur: Guðlaug Vilbogadóttir.
Síðast uppfært 21. janúar, 2026

Heimildaskrá

• 1
  Leigusamningur, dags. 22. desember 1949. Sóttur 26. september 2020 af https://vefuppfletti.fasteignaskra.is/leit; Helga Margrét Guðmundsdóttir (2020, 20. ágúst). Tölvupóstur.
• 2
  Jón Þ. Þór (2003). Hafnir á Reykjanesi. Saga byggðar og mannlífs í ellefu hundruð ár, bls. 184. Reykjanesbær: Reykjanesbær; Leó M. Jónsson (1991, 1. desember). Slysavarnadeildin Eldey í Höfnum 60 ára. Ágrip af sögu deildarinnar. Faxi, 51. árg., 7. tbl., bls. 203.
• 3
  Helga Margrét Guðmundsdóttir (2017, 11. janúar). Minnisblað um Aðalgötu 19. M.a. upplýsingar úr viðtali við Sigríði Einarsdóttur; Leó M. Jónsson (1991, 1. desember), bls. 203.
• 4
  Marta Eiríksdóttir (2019, 13. september). Gott að flytja heim aftur. Sótt 26. september 2020 af https://www.vf.is/mannlif/gott-ad-flytja-heim-aftur.