Hlaðbrekka 22, Kópavogi

Bærinn Bráðræði, sem Bráðræðisholtið í Reykjavík er kennt við, stóð nokkurn veginn þar sem húsið Grandavegur 37 er nú staðsett. Þar rak Thor Jensen umfangsmikinn búskap í byrjun síðustu aldar og lét m.a. reisa þar 30 kúa fjós, sem var með sjálfbrynningarbúnaði sem þótti mikil nýlunda. Íbúðarhúsið þótti veglegt þegar það var reist árið 1904, en varð síðar hrörnun að bráð.

Árið 1910 voru hjónin Sveinn Jón Einarsson (1872-1960) og Helga Ólafs­dóttir (1899-1953) eigendur Bráðræðis. Þar voru þau með búskap auk þess sem Sveinn stundaði ýmsa aðra vinnu, var kaup­maður, steinsmiður og hreinsaði úr kömrum bæjarbúa á nóttunni. Til þess notaði hann hest og kerru sem var með yfirbyggðum kassa (sjá mynd).

Það hefur líklega verið árið 1954 sem húsið var flutt að Hlaðbrekku 22 í Kópavogi, því það ár er skráð bygg­ingar­ár hússins í fasteignskrá. Þar stendur húsið enn, mikið breytt, því byggt hefur verið við það og settur á það stór kvistur, en þrátt fyrir það má greina gamla húsið í vesturhluta hússins.¹Pétur Pétursson (2000, 27. ágúst). Sögufrægt hús. Morgunblaðið, bls. 14-15 B.; Þorsteinn Jónsson (2011). Reykvíkingar. Fólkið sem breytti Reykjavík úr bæ í borg, bls. 635-636. Reykjavík: Sögusteinn; Páll Líndal (1991). Reykjavík. Sögustaður við Sund. 1. bindi, A – G, bls. 99. Reykjavík: Bókaútgáfan Örn og Örlygur hf.

Leitarorð: Kópavogur

Höfundur: Guðlaug Vilbogadóttir.
Síðast uppfært 14. desember, 2023

Heimildaskrá

• 1
  Pétur Pétursson (2000, 27. ágúst). Sögufrægt hús. Morgunblaðið, bls. 14-15 B.; Þorsteinn Jónsson (2011). Reykvíkingar. Fólkið sem breytti Reykjavík úr bæ í borg, bls. 635-636. Reykjavík: Sögusteinn; Páll Líndal (1991). Reykjavík. Sögustaður við Sund. 1. bindi, A – G, bls. 99. Reykjavík: Bókaútgáfan Örn og Örlygur hf.