Hlíðarvegur 13, Siglufirði

Á skilti á húsinu Hlíð sem er númer 13 við Hlíðarveg á Siglufirði segir að húsið sé byggt árið 1920 eins og kemur einnig fram í Fasteignaskrá Íslands. Þetta er ekki allskostar rétt því áður stóð þetta hús á skriðunni norðan Skútuár í landi Efri-Skútu innst í Siglufirði austanverðum og nefndist þá Árbakki. Tómthúsbýli þetta byggði Sigfús Ólafsson (1882-1980) og bjó þar með eiginkonu sinni Solveigu Jóhannsdóttur. Ekki er nákvæmlega vitað hvenær húsið var byggt en í heimildum kemur fram að það var byggt eftir 1900 en fyrir árið 1906. Þorfinna Marsibil (Þorfinna í Hlíð), dóttir þeirra Sigúsar (Fúsa í Hlíð) og Solveigu, var fædd 3. maí árið 1903 og er talið að þá hafi verið búið að byggja Árbakka, þannig að trúlega hafi það verið byggt árið 1901 eða 1902. Í Aldarminningu séra Bjarna Þorsteinssonar er Sigfús sagður hafa byggt húsið árið 1903.

Eftir skelfilegt snjóflóð aðfararnótt 12. apríl 1919 úr Skollaskál sem sópaði meðal annars síldarverksmiðju Evangers á haf út auk nokkurra íbúðarhúsa og annarra mannvirkja og tók líf níu manna, þótti ekki fýsilegt að búa lengur á þessum stað, en litlu munaði að flóðið tæki einnig Árbakka. Sigfús, eða Fúsi í Hlíð, brá því á það ráð að flytja hús sitt inn í Siglufjörð og reisti það við Hlíðarveg 13, þar sem það stendur enn og heitir nú Hlíð.¹Örlygur Kristfinnsson (2010, 15. maí). Munnleg heimild; Sigurjón Sigtryggsson (1986). Frá Hvanndölum til Úlfsdala. Þættir úr sögu Hvanneyrarhrepps, bls. 418 og 436-437. 3 bindi. Reykjavík: Sögusteinn; Bjarni Þorsteinsson (1918). Siglufjarðarverzlunarstaður hundrað ára 1818 – 20. maí – 1918. Aldar­minning. Ágrip af sögu kauptúns og sveitar, bls. 29. Reykjavík: Gutenberg; Ingólfur Kristjánsson (1988). Siglufjörður 1818 – 1918 – 1988. 170 ára verslunarstaður. 70 ára kaupstaðarréttindi, bls. 256-260. [Reykjavík:] Myllu Kobbi; Birna Lárusdóttir, Elín Ósk Hreiðarsdóttir o.fl. (2008). Fornleifaskráning í Hvanneyrarhreppi II: Minjar í Siglufirði (sunnan Siglufjarðarbæjar og austan fjarðar), Héðinsfirði og Hvanndölum, bls. 50. Reykjavík: Fornleifastofnun Íslands. Skýrsla nr. FS391-04042.

Segja má að Árbakki hafi verið eins konar miðstöð þeirra manna sem tóku þátt í björgunarstörfum eftir snjóflóðið árið 1919 og Sigfús var sendur yfir í kaupstaðinn til að sækja liðsauka og lækni. Fólkið, sem bjargað var úr snjóflóðinu, var flutt að Árbakka.²Ólafur Jónsson, Sigurjón Rist og Jóhannes Sigvaldason (1992). Skriðuföll og snjóflóð. Þriðja bindi. Snjóflóðaannáll, bls. 212. Reykjavík: Skjaldborg; Baldur Dýrfjörð (2025, 7. maí). Tölvupóstur.

Höfundur: Guðlaug Vilbogadóttir.
Síðast uppfært 30. júlí, 2025

Heimildaskrá

• 1
  Örlygur Kristfinnsson (2010, 15. maí). Munnleg heimild; Sigurjón Sigtryggsson (1986). Frá Hvanndölum til Úlfsdala. Þættir úr sögu Hvanneyrarhrepps, bls. 418 og 436-437. 3 bindi. Reykjavík: Sögusteinn; Bjarni Þorsteinsson (1918). Siglufjarðarverzlunarstaður hundrað ára 1818 – 20. maí – 1918. Aldar­minning. Ágrip af sögu kauptúns og sveitar, bls. 29. Reykjavík: Gutenberg; Ingólfur Kristjánsson (1988). Siglufjörður 1818 – 1918 – 1988. 170 ára verslunarstaður. 70 ára kaupstaðarréttindi, bls. 256-260. [Reykjavík:] Myllu Kobbi; Birna Lárusdóttir, Elín Ósk Hreiðarsdóttir o.fl. (2008). Fornleifaskráning í Hvanneyrarhreppi II: Minjar í Siglufirði (sunnan Siglufjarðarbæjar og austan fjarðar), Héðinsfirði og Hvanndölum, bls. 50. Reykjavík: Fornleifastofnun Íslands. Skýrsla nr. FS391-04042.
• 2
  Ólafur Jónsson, Sigurjón Rist og Jóhannes Sigvaldason (1992). Skriðuföll og snjóflóð. Þriðja bindi. Snjóflóðaannáll, bls. 212. Reykjavík: Skjaldborg; Baldur Dýrfjörð (2025, 7. maí). Tölvupóstur.